গুৱাহাটী, ২০ অক্টোবৰ : বক্ৰপথেৰে আৰক্ষীৰ চাকৰি ল’বলৈ গৈ CID ৰ জালত পৰিছে প্ৰাৰ্থী । ইজনৰ পৰা সিজনকৈ গ্ৰেপ্তাৰ হৈছে অসম আৰক্ষীৰ নিযুক্তি পৰীক্ষাত কম্পিউটাৰ পাঠ্যক্ৰমৰ ভুৱা নথি পত্ৰ দাখিল কৰা প্ৰাৰ্থী(Candidate submitted Fake Computer certificate) । বুধবাৰে পুনৰ ৩ জন প্ৰাৰ্থী গ্ৰেপ্তাৰ হৈছে এই অভিযোগত । সম্প্ৰতি ১১ জনলৈ বৃদ্ধি হৈছে ভুৱা কম্পিউটাৰ পাঠ্যক্ৰমৰ চাৰ্টিফিকেট দাখিল কৰা প্ৰাৰ্থীৰ গ্ৰেপ্তাৰৰ সংখ্যা । এই সংখ্যা আৰু বৃদ্ধি পোৱাৰ সম্ভাৱনা আছে ।
নতুনকৈ গ্ৰেপ্তাৰ হোৱা প্ৰাৰ্থী তিনিজন ক্ৰমে আতিকুৰ ৰহমান, অলি উল্লাহ আৰু মুস্তাফিজুৰ ৰহমান বুলি জানিব পৰা হৈছে । তিনিওজনে ধিং মহাবিদ্যালয়ৰ পৰা ভুৱা কম্পিউটাৰ পাঠ্যক্ৰমৰ চাৰ্টিফিকেট সংগ্ৰহ কৰিছিল বুলি জানিব পৰা গৈছে । ভুৱা কম্পিউটাৰ পাঠ্যক্ৰমৰ চাৰ্টিফিকেট দিয়া ৫৮ জন প্ৰাৰ্থীৰ তালিকা আছে CID ৰ হাতত । এই তালিকাত নিযুক্তি লাভ কৰি প্ৰশিক্ষণ লৈ থকা প্ৰাৰ্থীও থকা বুলি জানিব পৰা গৈছে ।
উল্লেখ্য যে, সোমবাৰে নিশা গ্ৰেপ্তাৰ হৈছিল আব্দুল ৰহমান, সমৰ দাস, জাবিদ আহমেদ, ফিৰোজ আহমেদ, ইছমাইল হুছেইন, দিলদাৰ অল হুছেইন, অশোক বৰ্মন আৰু অনিৰ্বাণ দাস । অসম আৰক্ষীৰ কনিষ্টবল পৰ্যায়ৰ পৰীক্ষাত কম্পিউটাৰ পাঠ্যক্ৰমৰ ভুৱা নথি দাখিল কৰাৰ অভিযোগত সোমবাৰে দিনজোৰা জেৰাৰ পিছত নিশা ৮ জনকৈ প্ৰাৰ্থীক গ্ৰেপ্তাৰ কৰা হৈছিল ।
সোমবাৰে ২২ জন প্ৰাৰ্থীক CID কাৰ্যালয়লৈ তলব কৰা হৈছিল । বিষয় সন্দৰ্ভত CIDত ৫/২২ নম্বৰত এটি গোচৰ ৰুজু হৈছিল । সেই গোচৰৰ ভিত্তিত তদন্ত অব্যাহত ৰাখিছে CID য়ে । তদন্তৰ সময়ত বৰপেটা, বঙাইগাঁও, ধুবুৰী, নলবাৰী, নগাঁও, যোৰহাট, শিৱসাগৰৰ লগতে বিভিন্ন প্ৰান্ততে কম্পিউটাৰ চেন্টাৰসমূহত CID য়ে অভিযান চলাইছিল ।
এইসকল প্ৰাৰ্থীয়ে ২০১৮ চনত অসম আৰক্ষী নিযুক্তি প্ৰক্ৰিয়াত আবেদন কৰি ২০২১ ত শাৰীৰিক পৰীক্ষাত উত্তীৰ্ণ হৈ ২০২২ চনৰ ২০ ফেব্ৰুৱাৰীত লিখিত পৰীক্ষাত অৱৰ্তীণ হৈছিল(Assam Police recruitment 2022) । ১২ মে’ত ইয়াৰ ফলাফল ঘোষণা কৰা হৈছিল । কিন্তু ৪১৪ জন প্ৰাৰ্থীৰ কম্পিউটাৰ প্ৰমাণ পত্ৰ ভুৱা বুলি ফলাফল স্থগিত কৰি ৰখা হৈছিল(Police Recruitment Exam) । পূৰ্বেও CID য়ে প্ৰাৰ্থীসকলক কাৰ্যালয়লৈ মাতি কম্পিউটাৰ প্ৰমাণপত্ৰ ভেৰিফিকেচন কৰিছিল ।
লগতে পঢ়ক: Certificate forgery in police Recruitment: দুদিনৰ বাবে CID ৰ জিম্মালৈ ধৃত ৮ প্ৰাৰ্থী
