ডুমডুমা, ১৬ মাৰ্চঃনাগৰিকত্ব সংশোধনী আইন বাতিলৰ দাবীত ডুমডুমাত আছুৰ বাইক ৰেলী ৷ দীৰ্ঘদিন বিৰতিৰ পাছত নাগৰিকত্ব (সংশোধনী) আইন বাতিলৰ দাবীত ডুমডুমাত সোমবাৰে এক বাইক ৰেলী উলিয়াই ডুমডুমা আঞ্চলিক ছাত্ৰ সন্থাই । ডুমডুমা নগৰ খেলপথাৰৰ পৰা আৰম্ভ হোৱা বাইক ৰেলীত বিজেপি দল তথা চৰকাৰ লগতে নাগৰিকত্ব সংশোধনী আইন বিৰোধী বিভিন্ন শ্ল'গান দিয়া পৰিলক্ষিত হয় ৷
তিনিচুকীয়া,১৬ মাৰ্চঃ ৰাজ্যত অব্যাহত আছে কা’ বিৰুদ্ধি প্ৰতিবাদ ৷ জাতিধ্বংসী নাগৰিকত্ব সংশোধনী আইন বাতিলৰ দাবীত তিনিচুকীয়াৰ মাকুমত সোমবাৰে মাকুম আঞ্চলিক ছাত্ৰ সন্থাৰ উদ্যোগত আৰু বিভিন্ন দল-সংগঠনৰ সহযোগত উলিয়াই এক মটৰ চাইকেল ৰেলী ৷ মাকুম আঞ্চলিক ছাত্ৰ সন্থাৰ সাধাৰণ সম্পাদক জিতেন্দ্ৰ চুতীয়াৰ নেতৃত্বত বাহিৰ কৰা বাইক ৰেলীটো মাকুম ৰজনীকান্ত বৰদলৈ খেলপথাৰত আৰম্ভ কৰি সমগ্ৰ মাকুম অঞ্চলত পৰিভ্ৰমণ কৰি কা’ বিৰোধী শ্ল’গানে মুখৰিত কৰি তোলে সমগ্ৰ পৰিৱেশ ৷
ইফালে তিনিচুকীয়া সদৰ থানা চাৰি আলিৰ ডঃ ভূপেন হাজৰিকা উদ্যানত সোমবাৰে 'টাইপা'ৰ উদ্যোগত এক প্ৰতিবাদী অৱস্থান ধৰ্মঘট কাৰ্যসূচী ৰূপায়ণ কৰে। কৃষক নেতা অখিল গগৈৰ মুক্তি আৰু জাতিধ্বংসী 'কা' বাতিলৰ দাবীত এই প্ৰতিবাদী কাৰ্যসূচী ৰূপায়ন কৰে সংগঠনটোৱে ৷
নাহৰকটীয়া,১৬ মাৰ্চঃ নাহৰকটীয়াৰ পুৰনি ৰাজহ চক্ৰ বিষয়াৰ কাৰ্যালয়ৰ প্ৰাংগণত সোমবাৰে সদৌ টাই আহোম ছাত্ৰ সন্থা (আটাছু) ডিব্ৰুগড় জিলা সমিতিৰ উদ্যোগত আৰু নাহৰকটীয়া মহকুমা সমিতি সহযোগত টাই আহোম জনগোষ্ঠীক অতিশীঘ্ৰে জনজাতি প্ৰদান কৰা,অসমৰ পৰা নাগৰিকত্ব সংশোধনী আইন বাতিল কৰা আৰু "কা" বিৰোধী আন্দোলনত আটক কৰা আন্দোলনকাৰী সকলক বিনাচৰ্তে মুক্তি দিয়াৰ দাবীত দুঘন্টীয়া অৱস্থান ধৰ্মঘট কাৰ্যসূচী ৰূপায়ণ কৰে ।
শিৱসাগৰ,১৬ মাৰ্চঃ শিৱসাগৰত সোমবাৰে সন্ধিয়া সদৌ অসম ছাত্ৰ সন্থাৰ শিৱসাগৰ জিলা সমিতিয়ে আইন বাতিলৰ দাবীত শিৱসাগৰৰ ঐতিহাসিক ৰংঘৰৰ বাকৰিৰ পৰা বাহিৰ কৰে এক প্ৰতিবাদী জোৰ সমদল।।ৰংঘৰ বাকৰিৰ পৰা শিৱসাগৰ নগৰলৈ প্ৰতিবাদী জোৰ সমদল উলিয়াই বিভিন্ন প্ৰতিবাদী শ্ল'গানেৰে পৰিৱেশ উত্তাল কৰি তোলে ৷
লগতে পঢ়কঃকৰ’ণা ভাইৰাছৰ প্ৰাদুৰ্ভাৱঃ অসমৰ সংৰক্ষিত বনাঞ্চলসমূহ বন্ধৰ নিৰ্দেশ
