গুৱাহাটী, 27 ডিচেম্বৰ: যি সময়ত একাংশ লোকে গুৱাহাটী মহানগৰীৰ পথসমূহত য’তে-ত’তে থু-পিক পেলাই কদর্যময় পৰিৱেশৰ সৃষ্টি কৰিছে, সেই সময়তে সৌন্দৰ্য বৰ্ধনৰ বাবে মহানগৰীৰ মালিগাঁৱৰ ব্যৱসায়ী সকলৰ এক বিশেষ পদক্ষেপ ৷ মালিগাঁৱৰ এ.টি ৰোডৰ পদপথত ব্যৱসায়ী সকলে ফুলৰ তাব লগাই দৃষ্টি আকৰ্ষণ কৰিছে সকলোৰে ৷ প্ৰায় 45 খন ব্যৱসায়িক প্ৰতিষ্ঠানৰ স্বত্বাধিকাৰীয়ে মিলি বিভিন্ন ফুলৰ তাব লগাইছে সদাব্যস্ত পদপথটোত ৷ ইয়াৰ লগতে মালিগাঁৱৰ সমূহ ব্যৱসায়ীয়ে আন ব্যৱসায়ী সকলকো এনে পন্থা হাতত ল'বলৈ আহ্বান জনাইছে ৷
উল্লেখ্য যে, গড়কাপ্তানি বিভাগ আৰু গুৱাহাটী মহানগৰ উন্নয়ন বিভাগে উত্তৰ-পূৱৰ দুৱাৰমুখ গুৱাহাটী মহানগৰীৰ সৌন্দৰ্য বৰ্ধনৰ বাবে বিশেষ প্ৰচেষ্টা হাতত লৈছিল ৷ কিন্তু শেহতীয়াকৈ CAA বিৰোধী আন্দোলনৰ ফলত বহুটো স্থান পৰিণত হৈছে ধ্বংস স্তূপত ৷ তাৰ মাজতে এনে পদক্ষেপে নিশ্চয়কৈ এক ইতিবাচক দিশ কঢ়িয়াই আনিব বুলি আশা কৰিছে ব্যৱসায়ী সকলে ৷
