নিউজ ডেস্ক, 6 জুলাই: শুকুৰবাৰে শ্ৰীমন্ত শংকৰদেৱ কলাক্ষেত্ৰত অনুষ্ঠিত হয় অসম আৰক্ষী পৰিয়ালৰ কৃতি ছাত্ৰ ছাত্ৰী অভিনন্দন অনুষ্ঠান । অসম আৰক্ষীৰ মুখ্য কাৰ্যালয়ৰ উদ্যোগত অনুষ্ঠিত হোৱা এই অভিনন্দন অনুষ্ঠানত মুখ্য অতিথি হিচাপে উপস্থিত থাকে মুখ্যমন্ত্ৰী সৰ্বানন্দ সোণোৱাল । এই অভিনন্দন অনুষ্ঠানত উচ্চতৰ মাধ্যমিকত সুখ্যাতিৰে উত্তীৰ্ণ 25 গৰাকী আৰু হাইস্কুল শিক্ষান্ত পৰীক্ষাত উত্তীৰ্ণ 130 জনক সম্বৰ্ধনা জনায় । এই অভিনন্দন অনুষ্ঠানত মুখ্যমন্ত্ৰীয়ে কয় যে সাফল্যৰ ধাৰাবাহিকতা অটুট ৰাখক ছাত্ৰ ছাত্ৰী সকলে । লগতে কয় যে পৰিশ্ৰম কৰা ব্যক্তি কেতিয়াও বিফল নহয় । সকলোকে একাগ্ৰতাৰে অধ্যয়নত মগ্ন হ’বলৈ আহ্বান জনায় । ইয়াৰ উপৰিও সমাজত জাকত জিলিকা নাগৰিক হ’ব লাগে বুলিও মন্তব্য কৰে । আগন্তুক দিনত অসমীয়া সন্তান হিচাপে বিশ্বৰ বুকুত প্ৰতিষ্ঠা লাভ কৰিব । এইটো জীৱনৰ সোণালী সময় ।
আৰক্ষীৰ পুত্ৰ কন্যা হিচাপে গৌৰৱ অনুভৱ কৰিব লাগে সকলোৱে । শুকুৰবাৰৰ অনুষ্ঠানত মুখ্যমন্ত্ৰীৰ উপৰিও প্ৰেছ উপদেষ্টা হৃষিকেশ গোস্বামী, সঞ্চালক প্ৰধান কুলধৰ শইকীয়াকে প্ৰমুখ্য কৰি বহুলোক উপস্থিত থাকে ।
