গুৱাহাটী, 9 এপ্ৰিলঃ সমগ্ৰ দেশৰ লগতে ৰাজ্যতো চলিছে নিৰ্বাচনৰ গৰম বতাহ। ৰাজ্যৰ 14 টা লোকসভা সমষ্টিত নিৰ্বাচন সুকলমে অনুষ্ঠিত কৰিবলৈ প্ৰতিখন জিলাৰ প্ৰশাসনৰ লগতে কামৰূপ জিলা প্ৰশাসনো সাজু হৈ উঠিছে। আগন্তুক 23 এপ্ৰিলত গুৱাহাটী লোকসভা সমষ্টিত অনুষ্ঠিত হ'ব লগা ভোট গ্ৰহণৰ বাবে সম্পূৰ্ণৰূপে সাজু কামৰূপ জিলা প্ৰশাসন।
গুৱাহাটী লোকসভা সমষ্টিত নিৰ্বাচন সুকলমে অনুষ্ঠিত কৰাৰ বাবে কামৰূপ জিলা প্ৰশাসনে হাতত লৈছে বিশেষ ব্যবস্থা। ভোট গ্ৰহণৰ লগতে এইবাৰ কামৰূপ জিলাত নিয়োজিত কৰা হৈছে 9 হাজাৰ বিষয়া-কৰ্মচাৰী । এই ৯ হাজাৰ বিষয়া-কৰ্মচাৰী জিলা প্ৰশাসনে প্ৰদান কৰিছে তিনিটা পৰ্যায়ত প্ৰশিক্ষণ। কামৰূপ জিলাত 59 খন ভোট কেন্দ্ৰক ক্ৰিকেটেল ভোট কেন্দ্ৰ হিচাপে চিহ্নিত কৰা হৈছে। লোকসভা নিৰ্বাচনকলৈ কামৰূপ আবকাৰী বিভাগো বিশেষভাৱে তৎপৰ হোৱা দেখা গৈছে । জিলা প্ৰশাসন কার্যালয়ৰ পৰা আবকাৰী বিভাগে নিৰীক্ষণ কৰিব বটলিং প্লেন আৰু ৱেব হাউচ সমূহৰ কাম কাজ । বিভিন্ন সংবাদ মাধ্যম সমূহৰ ওপৰতো তীক্ষ্ণ দৃষ্টি ৰাখিব প্ৰশাসনে । প্ৰতিটো নিউজ চেনেল আৰু বাতৰি কাকতৰ নিৰীক্ষণৰ বাবে নিয়োগ কৰা হৈছে একোজনকৈ পৰ্যবেক্ষক।
গুৱাহাটী লোকসভা সমষ্টিত নিৰ্বাচন সুচাৰুৰূপে অনুষ্ঠিত কৰাৰ বাবে জিলা প্ৰশাসনে নিয়োগ কৰিছে ফ্লাইং স্কুৱাডৰ 13 টাকৈ দল। প্ৰতিটো ফ্লাইং স্কুৱাডৰ দলত তিনিজনকৈ বিষয়া নিয়োজিত হৈ থাকিব।
