গুৱাহাটী,১৪ অক্টোবৰ : বিশিষ্ট চিত্ৰ শিল্পী, চলচ্চিত্ৰ নিৰ্মাতা পুলক গগৈলৈ আগবঢ়োৱাৰ হৈছে ২২-২৩ বৰ্ষৰ অসম জাতীয় বিদ্যালয় ফেল’শ্বিপ সন্মান (Assam Jatiya Bidyalay Fellowship Award for 2022-23 Announced) । অহা ৩০ অক্টোবৰত অসম জাতীয় বিদ্যালয় শৈক্ষিক আৰু আৰ্থ-সামাজিক ন্যাসে বিশিষ্ট শিল্পীগৰাকীলৈ আগবঢ়াব এই বিশেষ সন্মান । শুকুৰবাৰে সংবাদমেল যোগে এই কথা সদৰী কৰে অসম জাতীয় বিদ্যালয়ৰ শৈক্ষিক আৰু আৰ্থ-সামাজিক ন্যাসৰ সচিব ডাঃ নাৰায়ন শৰ্মাই ।
তেওঁ কয় যে, ৰাষ্ট্ৰীয় তথা আন্তঃৰ্জাতিক পৰ্যায়ত যিকেইজন মুষ্টিমেয় অসমীয়া নিজস্ব কৰ্মৰাজিৰে উজলি উঠিছে তাৰে ভিতৰত চিত্ৰশিল্পী, চলচিত্ৰ নিৰ্মাতা,পৰিচালক পুলক গগৈ অন্যতম । অসমৰ সাংস্কৃতিক জগতত বৰেণ্য শিল্পীগৰাকীয়ে আগবঢ়োৱা অৱদানৰ প্ৰতি সন্মান জনাই ন্যাসে এই সিদ্ধান্ত গ্ৰহণ কৰে । অসম জাতীয় বিদ্যালয়ৰ এই ফেল’শ্বিপত থাকিব স্মাৰক, সম্বৰ্ধনা, অংগবস্ত্ৰ, কিতাপৰ টোপোলা, জাতীয় বিদ্যালয়ৰ প্ৰতীক সম্বলিত গামোচা আৰু দুবছৰৰ বাবে প্ৰতিমাহে ৫ হাজাৰ টকাকৈ আৰ্থিক অনুদান ।
২০০৮ চনৰ পৰা অসম জাতীয় বিদ্যালয়ে সমাজৰ বিভিন্ন ক্ষেত্ৰৰ লগত জড়িত বিশিষ্ট ব্যক্তিক এই সন্মান প্ৰদান কৰি আহিছে ৷ অৱশ্যে ক'ভিড সৃষ্ট পৰিৱেশৰ বাবে যোৱা দুটা বৰ্ষত অসম জাতীয় বিদ্যালয় ন্যাসে প্ৰদান কৰিব পৰা নাছিল জাতীয় বিদ্যালৰ ফেল’শ্বিপ সন্মান । ইফালে অসম জাতীয় বিদ্যালয়ৰ ফেল’শ্বিপৰ উপৰিও সমাজৰ বিভিন্ন ক্ষেত্ৰৰ লগত জড়িত ৫ গৰাকী বিশিষ্ট ব্যক্তিলৈ আগবঢ়োৱা হৈছে অসম জাতীয় বিদ্যালয় সন্মান ।
লগতে পঢ়ক : Agricultural revolution in Jonai: জোনাইত এজন যুৱকৰ কৃষি বিপ্লৱ
২০২২ বৰ্ষৰ বাবে এই সন্মান লাভ কৰিছে প্ৰবীণ অভিনেত্ৰী জ্ঞানদা কাকতি, গীতিকাৰ তথা শিশু সাহিত্যক পদ্মশ্ৰী এলি আহমেদ, বিশিষ্ট গীতিকাৰ-সংগীত শিল্পী ড৹ লক্ষ্যহীৰা দাস, গৱেষক তথা অধ্যাপক ড৹ বীৰেন্দ্ৰ নাথ দত্ত আৰু বিশিষ্ট শিক্ষাবিদ ফণী চেতিয়া । অসম জাতীয় বিদ্যালয় সন্মান লাভ কৰা পাঁচগৰাকী বিশিষ্ট ব্যক্তিক বিশেষভাৱে সম্বৰ্ধনা জনোৱাৰ লগতে নগদ ২৫ হাজাৰ টকাকৈ আগবঢ়াব ন্যাসে ।
অহা ৩০ অক্টোবৰত অসম জাতীয় বিদ্যালয় প্ৰেক্ষাগৃহত বিয়লি ভাগত অনুষ্ঠিত হ’ব লগা বিশেষ অনুষ্ঠানত আয়োজন কৰা বিশেষ অনুষ্ঠানত এই বঁটাসমূহ প্ৰদান কৰিব বুলি জানিবলৈ দিয়ে ন্যাসৰ সচিব ডাঃ নাৰায়ন শৰ্মাই । ইফালে অহা ২৯ অক্টোবৰত হ’বলগীয়া অসম জাতীয় বিদ্যালয়ৰ বাৰ্ষিক সাংস্কৃতিক অনুষ্ঠান ‘‘গীত মাতৰ গধূলি’’ত উপস্থিত থাকিব জনপ্ৰিয় অভিনেতা ৰবি শৰ্মা আৰু বড়ো সাহিত্য সভাৰ সভাপতি তৰেন বড়ো ।
উল্লেখ্য যে, শুকুৰবাৰে আয়োজিত এই সংবাদমেলত অসম জাতীয় বিদ্যালয়ৰ সভাপতি দিলীপ কুমাৰ দত্ত চৌধাৰী, অধ্যক্ষ ঘনশ্যাম মেধি, উপাধ্যক্ষ ৰবীন্দ্ৰ বৰ্মণ, জ্যেষ্ঠ শিক্ষক অসীম কৃষ্ণ বৰুৱা উপস্থিত থাকে ।
লগতে পঢ়ক : অগপ শক্তিশালী হ’লেহে আঞ্চলিকতাবাদ শক্তিশালী হ’ব: অতুল বৰা
