গুৱাহাটী, 14 জুলাই : উচ্চ শিক্ষা (Higher Study)ৰ পৰীক্ষা সন্দৰ্ভত নতুন নিৰ্দেশনা জাৰি কৰিছে অসম চৰকাৰ (Assam Govt)য়ে । মঙলবাৰে এক নতুন নিৰ্দেশনা (New Rule) জাৰি কৰি উচ্চ শিক্ষাৰ বাবে প্ৰৱেশিকা পৰীক্ষা (Entrance Exam) আৰু বিভিন্ন নিযুক্তি সম্বন্ধীয় পৰীক্ষা অনুষ্ঠিত কৰাৰ ক্ষেত্ৰত অনুমতি প্ৰদান কৰিছে ৰাজ্য চৰকাৰে । বুধবাৰৰ পৰা এই নিৰ্দেশনা কাৰ্যকৰী হ’ব । নিৰ্দেশনাত উল্লেখিত অনুসৰি, বিভিন্ন বিভাগ, সংগঠন তথা সংস্থাসমূহে প্ৰাৰ্থীসকলৰ স্বাৰ্থৰ বাবে অফলাইন (Offline) পদ্ধতিত ৰাজ্যজুৰি নিযুক্তি আৰু প্ৰৱেশিকা পৰীক্ষা অনুষ্ঠিত কৰাৰ অনুমতি লাভ কৰিছে ।
এই সন্দৰ্ভত অসম ৰাজ্যিক দুৰ্যোগ ব্যৱস্থাপনা বিভাগ (Assam Disaster Management Authority)য়ে জাৰি কৰিছে এক নিৰ্দেশনা । সেই অনুসৰি, সমগ্ৰ ৰাজ্যতে উচ্চ শিক্ষাৰ বাবে নিযুক্তি আৰু প্ৰৱেশিকা পৰীক্ষাৰ অনুমতি দিয়া হৈছে । এই সন্দৰ্ভত ক’ভিড (Covid) প্ৰট’কল সম্পূৰ্ণৰূপে মানি চলিব লাগিব । পৰীক্ষাসমূহ পৰীক্ষাগৃহৰ 50 শতাংশ আসন ক্ষমতা বা 50 গৰাকী পৰীক্ষাৰ্থীৰ সৈতে অনুষ্ঠিত কৰিব লাগিব ।
200 ৰ অধিক প্ৰাৰ্থীক কোনো কেন্দ্ৰত পৰীক্ষা দিবলৈ অনুমতি প্ৰদান কৰা নহ’ব । ইয়াৰোপৰি পৰীক্ষাৰ সময়ত পৰীক্ষাৰ্থীসকলক আন্তঃজিলা যাতায়াত, সান্ধ্য আইন, নগৰাঞ্চলত যান-বাহন চলাচলৰ ক্ষেত্ৰত প্ৰযোজ্য যুগ্ম-অযুগ্ম নীতিৰ পৰা সম্পূৰ্ণ ৰেহাই দিয়া হ’ব । অৱশ্যে পৰীক্ষাৰ্থীসকলে বৈধ এডমিট কাৰ্ড (Admit Card) দেখুৱাব লাগিব ।
লগতে পঢ়ক : জলজীৱন মিছন : প্রতিদিনে খৰচ হোৱা পানীৰ হিচাব ল’ব ৰণজিৎ কুমাৰ দাসে
