গুৱাহাটী, ২৭ মে’: 'বিশ্ব এতিয়া প্ৰতিযোগিতাৰে ভৰি পৰিছে আৰু তীব্ৰ প্ৰতিযোগিতাৰ এই যুগত জীয়াই থাকিবলৈ আমাৰ মেধাৱী যুৱ ছাত্ৰ-ছাত্ৰীসকলে যিকোনো ক্ষেত্ৰতে উৎকৃষ্ট প্ৰদৰ্শনৰ বাবে চেষ্টা কৰিব লাগিব । এয়া নিঃসন্দেহে ’যোগ্য ভোগ্য বসুন্ধৰাৰ যুগ ।’- শুকুৰবাৰে গুৱাহাটীৰ শ্ৰীমন্ত শংকৰদেৱ কলাক্ষেত্ৰৰ আন্তঃৰাষ্ট্ৰীয় প্ৰেক্ষাগৃহত কটন বিশ্ববিদ্যালয়ৰ দ্বিতীয় সমাৱৰ্তন অনুষ্ঠানত ভাষণ প্ৰদান কৰি অসমৰ ৰাজ্যপাল তথা কটন বিশ্ববিদ্যালয়ৰ আচাৰ্য অধ্যাপক জগদীশ মুখীয়ে ক'লে এনেদৰে (Governor present at Second Convocation of Cotton University)।
ডিগ্ৰীপ্ৰাপ্ত সকললৈ শুভেচ্ছা জ্ঞাপন কৰি অধ্যাপক মুখীয়ে সমাজৰ প্ৰতি ছাত্ৰ-ছাত্ৰীসকলৰ এক দায়িত্ব আছে বুলি গুৰুত্ব আৰোপ কৰে ।
তেওঁ কয় যে, "আমাৰ দেশে আমাক সকলো দিছে । বিনিময়ত আমি কিবা এটা ঘূৰাই দিয়া উচিত । তোমালোকে দেশত থাকি দেশৰ সেৱা কৰা উচিত । আমাৰ দেশে নতুন উদ্যোগ স্থাপনৰ বাবে এক শক্তিশালী ভেটি গঢ়ি তুলিছে । সেয়েহে, আমাৰ ছাত্ৰ-ছাত্ৰীসকলে সহযোগিতা কৰা উচিত, দেশত থকা উচিত আৰু দেশৰ সেৱা কৰি আত্মনিৰ্ভৰ হোৱা উচিত ৷"
আনহাতে, উক্ত অনুষ্ঠানত অসমীয়া সাহিত্য আৰু কাৰ্বি ভাষালৈ আগবঢ়োৱা উল্লেখযোগ্য অৱদানৰ বাবে বিশিষ্ট সাহিত্যিক ৰংবং তেৰাঙক সন্মানীয় ডি.লিট. ডিগ্ৰী প্ৰদান কৰা হয় ৷ সৰ্বমুঠ ১৩৭৫ গৰাকী ছাত্ৰ-ছাত্ৰীক ডিগ্ৰী প্ৰদান কৰা হয় । সমাৱৰ্তন অনুষ্ঠানত ৫৭ গৰাকী বিভিন্ন বিষয়ত শীৰ্ষস্থান লাভ কৰা ছাত্ৰীক সোণৰ পদক প্ৰদান কৰাৰ লগতে ১১ গৰাকী ছাত্ৰ-ছাত্ৰীক ডক্টৰেট ডিগ্ৰী প্ৰদান কৰা হয় ।
এই উপলক্ষে সমাৱৰ্তন বক্তা হিচাপে উপস্থিত থকা হায়দৰাবাদ বিশ্ববিদ্যালয়ৰ উপাচাৰ্য তথা অধ্যাপক বসুথকৰ জগদীশ্বৰ ৰাৱে (Basuthkar Jagadeeshwar Rao)তেওঁৰ ভাষণত এটা জাতি গঠনত গুণগত শিক্ষাৰ প্ৰয়োজনীয়তা ওপৰত গুৰুত্ব আৰোপ কৰে(Professor of Hyderabad University in Guwahati) ।
তেওঁ আৰু কয় যে, "আমাৰ দৰে এটা মহান জাতিৰ ভৱিষ্যত ইয়াৰ যুৱ প্ৰজন্ম, তেওঁলোকে গ্ৰহণ কৰা শিক্ষাৰ মানদণ্ড আৰু মূল্যবোধৰ ওপৰত নিৰ্ভৰশীল । উচ্চ শিক্ষাৰ ভূমিকা কেৱল তথ্য যোগান ধৰাই নহয়, আনকি কেৱল বুদ্ধিৰ বিকাশ কৰাই নহয়, কল্পনা আৰু সৃষ্টিশীলতাক প্ৰজ্বলিত কৰাও ইয়াৰ লক্ষ্য । এইবোৰ কেৱল শৈক্ষিক কথা নহয় ৷ আমি পণ্ডিত আৰু নেতাও সৃষ্টি কৰিব লাগিব ৷ ছাত্ৰ-ছাত্ৰী সকলক কেৱল চাকৰিৰ বাবে নহয়, কেৰিয়াৰৰ বাবে প্ৰস্তুত কৰিব লাগিব ।"
আনহাতে, অসম চৰকাৰৰ শিক্ষামন্ত্ৰী ডাঃ ৰণোজ পেগুৱে অনুষ্ঠানত ভাষণত প্ৰদান কৰি কয় যে, উচ্চ শিক্ষাৰ প্ৰতিষ্ঠানসমূহে পাঠ্যক্ৰমসমূহ তিনিটা মূল বিষয়ত কেন্দ্ৰীভূত কৰিব লাগে আৰু সেইকেইটা হ'ল- ছাত্ৰ-ছাত্ৰীৰ নিয়োগ যোগ্যতা বৃদ্ধি কৰা, পাঠ্যক্ৰম প্ৰস্তুত কৰা, উদ্যোগী সৃষ্টিৰ ক্ষেত্ৰত প্ৰেৰণা যোগোৱা আৰু গৱেষণা ক্ষেত্ৰত গুৰুত্ব প্ৰদান কৰা ।
ইফালে, প্ৰতিবেদন দাখিল কৰি বিশ্ববিদ্যালয়ৰ উপাচাৰ্য তথা অধ্যাপক ভবেশ চন্দ্ৰ গোস্বামীয়ে বিগত দুবছৰত হোৱা উন্নয়নৰ ক্ষেত্ৰত আলোকপাত কৰে । এক শৈক্ষিক শোভাযাত্ৰাৰে আৰম্ভ হোৱা সমাৱৰ্তন অনুষ্ঠানত বিশ্ববিদ্যালয়ৰ আচাৰ্য, উপাচাৰ্য, শিক্ষামন্ত্ৰী, সমাৱৰ্তন বক্তা, পঞ্জীয়ক, শৈক্ষিক পঞ্জীয়ক, ডীন সকল, বিশ্ববিদ্যালয় কোৰ্ট, কাৰ্যবাহী পৰিষদ আৰু শৈক্ষিক পৰিষদৰ সদস্য সকলে অংশগ্ৰহণ কৰে ৷
এই শোভাযাত্ৰাৰ শুভাৰম্ভণি কৰে পঞ্জীয়ক অধ্যাপক দিগন্ত কুমাৰ দাসে । অনুষ্ঠানটোৰ আঁত ধৰে ইংৰাজী বিভাগৰ সহযোগী অধ্যাপিকা ড° মেৰী বৰুৱাই ৷ অনুষ্ঠানটো সফলভাৱে সম্পন্ন কৰাৰ বাবে উপাচাৰ্য অধ্যাপক ভবেশ চন্দ্ৰ গোস্বামী আৰু সমাৱৰ্তন আহ্বায়ক ড° শান্তনু চক্ৰৱৰ্তীয়ে উপস্থিত সকলোকে ধন্যবাদ জ্ঞাপন কৰে ।
লগতে পঢ়ক : Act East Through Northeast: গুৱাহাটীত অনুষ্ঠিত Act East সম্মিলন
