গুৱাহাটী, 29 ডিচেম্বৰ: বিগত চাৰি দশকৰ বিভিন্ন সশস্ত্র কার্যকলাপ, হত্যা, হিংসা, বাৰুদৰ দাবানলৰ পাচত বিগত বাৰ বছৰে চলি থকা আলোচনাৰ শেষত আলফাৰ আলোচনাপন্থী গোট আৰু কেন্দ্রীয় চৰকাৰৰ মাজত স্বাক্ষৰিত হ’বলগীয়া ত্ৰিপাক্ষিক শান্তি চুক্তিক APW (Assam Public Works) য়ে উষ্ম আদৰণি জনাইছে। ইটিভি ভাৰতক এই কথা জনাইছে APWৰ সভাপতি অভিজিৎ শৰ্মা বৰুৱাই।
অভিজিৎ শৰ্মা বৰুৱাই লগতে কয় যে, "শান্তি চুক্তি' স্বাক্ষৰৰ এই প্ৰাকমুহূর্তত দেশৰ সার্বভৌমত্ব আৰু অখণ্ডতাক প্রথম স্থান দি অহ্য এক সংগঠন হিচাপে এই পদক্ষেপক আদৰণি আৰু সকলো পক্ষকে আন্তৰিক অভিনন্দন জনাইছো ৷ যোৱা একাধিক দশক আলফাৰ ৰক্তৰঞ্জিত সশস্ত্ৰ সংগ্ৰামৰ বিৰোধিতা কৰি স্থায়ী সমাধানৰ বাবে আহ্বান জনাই আহিছো ৷ বিগত প্রায় 44 বছৰ জোৰা এই সংঘাতৰ ফলত হোৱা ক্ষয়-ক্ষতিৰ পৰিমাণ সংখ্যাৰে জুখিব নোৱাৰি তথা এই সংঘাতে অসমৰ চুকে-কোণে থকা প্রতিটো পৰিয়ালকে ক্ষতি কৰিছে।"
লগতে APWৰ সভাপতিগৰাকীয়ে কয় যে যদিও এই "শান্তি চুক্তি স্বাক্ষৰ প্রক্রিয়া”ক লৈ আলফা স্বাধীনক আনিব পৰা নগ'ল, তথাপি আলফাৰ ৰাজনৈতিক গোট তথা জন্মলগ্নৰ গৰিষ্ঠসংখ্যক নেতা এই প্রক্রিয়াৰে জড়িত হোৱাটো অসমৰ অনাগত বাজনৈতিক ভৱিষ্যতৰ বাবে শুভলক্ষণ বুলি আছাম পাব্লিক বর্কছে বিশ্বাস কৰে। কিন্তু "শান্তি চুক্তি" স্বাক্ষৰিত হোৱাৰ কিছুদিন পূৰ্বৰে পৰা আজি প্রায় 15 বছৰে স্থবিৰ হৈ থকা আলফাক লৈ হঠাৎ অসম আৰক্ষীৰ অস্ত্ৰ গৰজি উঠিবলগীয়া হোৱা কথাটোত কিছু ৰহস্যৰ গোন্ধ পোৱা গৈছে ।"
গুপ্তহত্যাই হওক বা মুক্ত হত্যাই হওক, আমি যিকোনো হত্যাৰ তীব্র বিৰোধী । সমস্যা সমাধানৰ বাট সদায় আলোচনাৰ মজিয়া । এই মুহূর্তত এই শান্তি চুক্তিয়ে অসমৰ আকাশলৈ কিছু আশাৰ বতৰা কঢ়িয়াই আনিছে একেই সময়তে ৰাজ্যৰ বিভিন্ন প্রান্তত অস্ত্রৰ শব্দই আকৌ অশান্ত ভৱিষ্যতৰ ইংগিতহে বহন কৰিছে বুলি উদ্বেগ প্ৰকাশ কৰে অভিজিৎ শৰ্মাই ৷
লগতে তেওঁ কয় যে, "ভুলে-শুদ্ধই যদি আৰক্ষীয়ে গুলী চলাই ঘূণীয়া কৰি পৰিস্থিতি শান্ত কৰি ৰখাৰ মনোভাৱ পোষণ কৰে তেন্তে ই উঠি অহা যুৱ সমাজক ক্ষুণ্ণ কৰি বিদ্রোহী মানসিকতা গা কৰি উঠাতহে সাৰ পানী যোগাব।"
আনকি নিজৰ ফেচবুক পেজতো অভিজিৎ শৰ্মাই এইদৰে লিখিছিল, “চৰকাৰ আৰু আলফাৰ মীমাংসা চুক্তি। APW welcomes from the bottom of our heart. মীমাংসা চুক্তিৰ সমান্তৰালভাৱে নিৰীহ অসমীয়া যুৱকক এনকাউণ্টাৰৰ তীব্ৰ বিৰোধিতা কৰিছোঁ । আগতে আছিল গুপ্তহত্যা, আজিকালি মুক্তহত্যা ৷”
লগতে পঢ়ক: মূল ৰাজনৈতিক প্ৰশ্নটো শান্তি চুক্তিয়ে স্পৰ্শ কৰিবনে ?-অখিল গগৈ
