গুৱাহাটী,27 জুলাইঃ Injustice Against APSC নামৰ সংগঠনটোৱে অসম লোকসেৱা আয়োগৰ সংযুক্ত প্ৰতিযোগিতামূলক প্ৰাৰম্ভিক পৰীক্ষা 2018 ত সংঘটিত অনিয়ম সংক্ৰান্তত সংবাদমেলৰ আয়োজন কৰে ৷ সংবাদমেলত সংগঠনটোৰ সম্পাদক মানস প্ৰতীম বৰুৱাই প্ৰাৰম্ভিক পৰীক্ষাত 10 টাকৈ গুৰুত্বৰ অনিয়ম সংঘটিত হোৱাৰ কথা তথ্যসহ ফাদিল কৰে ৷ সম্পাদকগৰাকীয়ে ভ্ৰান্তিসমূহ একাদিক্ৰমে উল্লেখ কৰি কয় যে, APSC ৰ প্ৰাৰম্ভিক পৰীক্ষাতেই 94 টা ভূল উত্তৰ সন্নিৱিষ্ট আছিল প্ৰশ্নকাকতখনত ৷ গতিকে পৰীক্ষাৰ্থীয়ে এই সন্দৰ্ভত একো নজনাকৈয়েই পৰীক্ষাত অৱৰ্তীণ হ'বলগীয়া হ'ল ৷ দ্বিতীয় অনিয়ম সন্দৰ্ভত উল্লেখ কৰি বৰুৱাই কয় যে সকলো জনাৰ, পাছতো সীমাহীন ক্ৰুটিপূৰ্ণ প্ৰশ্নোত্তৰ পৰীক্ষণ কৰি প্ৰশ্ন কাকত প্ৰস্তুত কৰিছিল লোকসেৱা আয়োগে ৷ তদুপৰি নিজাববীয়াকৈ উত্তৰ বহী পৰীক্ষণ আৰু APSC ৰ পৰীক্ষাৰ নিয়মাৱলী সম্পৰ্কে উল্লেখ থকা ৰুল 51 ৰ বহী পৰীক্ষণৰ ক্ষেত্ৰত প্ৰয়োগ নোহোৱা আৰু লগতে প্ৰথম আৰু দ্বিতীয় পৰ্যায়ৰ বাবে সংগতিবিহীনভাৱে প্ৰাৰ্থী বাছনি কৰা ইত্যাদি বিষয়সমূহ উত্থাপন কৰে ৷ আনহাতে ভুল বুলি গ্ৰাহ্য হোৱা প্ৰশ্নকাকতত গ্ৰেছ মাৰ্ক দিব পাৰে বুলি উচ্চতম ন্যায়ালয়ে প্ৰদান কৰা ৰায়ৰ আলম লৈ অসম লোকসেৱা আয়েগে পূৰ্বৰ 2016 চনৰ আয়োজিত পৰীক্ষাত 33 টা প্ৰশ্নত গ্ৰেছ মাৰ্ক প্ৰদান কৰাৰ বিপৰীতে এইবাৰৰ প্ৰাৰম্ভিক পৰীক্ষাত অভিলেখ সংখ্যক 52 টা প্ৰশ্নত গ্ৰেছ মাৰ্ক প্ৰদান কৰিছিল ৷ ইয়াৰ কাৰণ সম্পৰ্কত আশ্চৰ্য প্ৰকাশ কৰে সংগঠনটোৰ নেতৃত্বই ৷
এনেধৰণৰ সংঘটিত অনিয়মে অসম লোকসেৱা আয়োগ ভাঙি পৰাৰ সম্ভাৱনীয়তাক অধিক প্ৰকট কৰা বুলি ব্যক্ত কৰে মানস প্ৰতীম বৰুৱাই । যদি এটা সাংবিধানিক সংস্থাই প্ৰাৰম্ভিক পৰীক্ষা অনুষ্ঠিত কৰোতেই এনেধৰণৰ অনিয়ম কৰে তেন্তে মূল পৰীক্ষা কিমান ক্ৰুটিপূৰ্ণ ভাবে চলাই নিব সেই বিষয়ত প্ৰশ্ন উত্থাপন কৰিছে Injustice Against APSC নামৰ সংগঠনটোৱে ৷
