গুৱাহাটী, ১৯ অক্টোবৰ : বাংলাদেশত হিন্দুৰ ওপৰত চলা আক্ৰমণ আৰু বৰাকত অসমীয়া ভাষাৰ ওপৰত চলা আক্ৰমণৰ ঘটনাক কঠোৰ ভাষাৰে গৰিহণা দিছে প্ৰদেশ কংগ্ৰেছে । মঙলবাৰে গুৱাহাটীৰ ৰাজীৱ ভৱনত এই সন্দৰ্ভত এখন সংবাদমেল সম্বোধন কৰে প্ৰদেশ কংগ্ৰেছৰ মুখপাত্র অভিজিত মজুমদাৰে । শিলচৰত অসমীয়া ভাষাক অপমান কৰা সন্দৰ্ভত তেওঁ কয়, ''এনেকুৱা নিকৃষ্ট ৰাজনীতি কৰিব নালাগে যাতে অসমীয়া আৰু বাংলাভাষী হিন্দুৰ মাজত থকা ভাতৃত্ববোধত আঘাত জন্মে । আমি এই কাৰ্যক নিন্দা কৰাৰ লগতে গৰিহণা দিছো । ''
এইক্ষেত্রত মুখ্যমন্ত্রী কিয় নিৰৱ হৈ আছে বুলিও তেওঁ প্ৰশ্ন কৰে । ইয়াৰ লগতে তেওঁ শীঘ্ৰেই এই ঘটনাৰ সৈতে জড়িত লোকসকলক গ্ৰেপ্তাৰ কৰাৰ ব্যৱস্থা কৰাৰ আহ্বান জনায় চৰকাৰক । তেওঁ কয় '' শীঘ্ৰেই সেই লোকসকলক গ্ৰেপ্তাৰ কৰাৰ ব্যৱস্থা কৰক, যাতে ভৱিষ্যতে কোনেও এনেকুৱা কাম কৰিবলৈ সাহস কৰিব নোৱাৰে । প্ৰদীপ দত্ত ৰয়ৰ দৰে ভণ্ডসকলে যাতে এনে কাম কৰিব নোৱাৰে । প্ৰদীপ দত্ত ৰয় এটা সময়ত বিজেপিৰ মুখপাত্র আছিল । ''
আনহাতে, বাংলাদেশত হিন্দুসকলৰ ওপৰত চলা আক্ৰমণৰ ঘটনা সন্দৰ্ভতো মত প্ৰকাশ কৰে প্ৰদেশ কংগ্ৰেছৰ মুখপাত্র গৰাকীয়ে ৷
এই সন্দৰ্ভত তেওঁ কয়, '' ভাৰত চৰকাৰে এইক্ষেত্রত কোনো ধৰণৰ প্ৰতিক্ৰিয়া প্ৰকাশ নকৰাটো আচৰিত কথা । ভাৰতৰ প্ৰধানমন্ত্রীয়ে বাংলাদেশৰ প্ৰধানমন্ত্রীৰ লগত ঘটনা সন্দৰ্ভত কথা পাতিব লাগিছিল । এনেই মাথো হিন্দুত্বৰ কথা ক'লে নহ'ব । ভাৰতৰ লগত বাংলাদেশৰ ভাল সম্পৰ্ক আছে । ভাৰতে বিভিন্ন ক্ষেত্রত বাংলাদেশক সহায় কৰি আহিছে । মাথো হিন্দু-মুছলিমৰ ৰাজনীতি কৰিলে নহ'ব । আমি কংগ্ৰেছ দলে বাংলাদেশৰ ঘটনাৰ প্ৰতিবাদ জনাম । ''
লগতে পঢ়ক : উত্তৰাখণ্ডত ধাৰাসাৰ বৃষ্টিপাত : সতৰ্কতা ৰেখাৰ ওপৰেৰে গংগা
