নিউজ ডেস্ক, 29 জানুৱাৰীঃ আজি বাগদেৱীৰ বন্দনাৰে মুখৰিত হ'ল চৌপাশ ৷ বিদ্যাৰ অধিষ্ঠাত্ৰী দেৱীৰ পূজা অৰ্চনাত ব্যস্ত সকলো শিক্ষাৰ্থী ৷ ৰাজ্যৰ শিক্ষানুষ্ঠানসমূহত দেখা গ'ল সৰস্বতী পূজাৰ ব্যাপক আয়োজন ৷
গুৱাহাটীঃ গুৱাহাটী মহানগৰীৰ বিভিন্ন শিক্ষানুষ্ঠানত দেখিবলৈ পোৱা গ'ল সৰস্বতী পূজাৰ ব্যাপক আয়োজন ৷ কটন বিশ্ববিদ্যালয়ৰ গণ সংযোগ, সাংবাদিকতা আৰু মিডিয়া অধ্যয়ন বিভাগত 29 জানুৱাৰীৰ দিনটোত পালন কৰা হ'ল সৰস্বতী পূজা ৷ বিভাগটোৰ প্ৰাক্তন ছাত্ৰ-ছাত্ৰীকে ধৰি বৰ্তমানৰ ছাত্ৰ-ছাত্ৰী একত্ৰিত হৈ মিলাপ্ৰীতিৰে সম্পাদন কৰিলে বাগদেৱীৰ পূজা ৷
বৰমাঃ আনহাতে ৰাজ্যৰ বিভিন্ন ঠাইৰ লগতে বৰমাতো ভিন্ন বিদ্যালয়-মহাবিদ্যালয়ত দেখিবলৈ পোৱা গ'ল দেৱী সৰস্বতীৰ উপাসনাৰ আয়োজন অনুষ্ঠান ৷ কিন্তু বৰমাৰ একাংশ শিক্ষানুষ্ঠানত কাইলৈয়ো আয়োজন কৰা হ'ব সৰস্বতী পূজা ৷ বৰমাৰ মৃন্ময় মূৰ্তি নিৰ্মাণ কৰা খনিকৰসকলে এইবেলি বিদ্যাৰ অধিষ্ঠাত্ৰী দেৱী সৰস্বতী পূজা দুদিনীয়া হোৱাৰ ফলত, মূৰ্তিসমূহ বিক্ৰী নোহোৱাকৈ ৰৈ যোৱাৰ সম্ভাৱনা প্ৰকাশ কৰিছে ৷
চিৰাংঃ চিৰাং জিলাৰ জাখনৰ পাণবাৰী আলুখুন্দা মিলন জ্যোতি হাইস্কুল আৰু গৰাইমাৰী এম.ই মাদ্ৰাছাত প্ৰতিবছৰৰ দৰে এইবাৰো, উলহ-মালহেৰে বিদ্যাৰ অধিষ্ঠাত্ৰী বাগদেৱীক পূজা অৰ্চনা কৰে ৷ পূজাত বিদ্যলয় দুখনৰ প্ৰাক্তন আৰু বৰ্তমানৰ সকলো ছাত্ৰ-ছাত্ৰীৰ ভগৱানৰ ওচৰত এটাই প্ৰাৰ্থনা যে, তেওঁলোকৰ বিদ্যালয়খন যাতে প্ৰাদেশিকীৰনৰ ব্যৱস্থা কৰে ৷ কিয়নো জানিবলৈ পোৱা মতে, ১৯৮৮ চনতে স্থাপন হোৱা স্বত্বেও মিলন জ্যোতি হাইস্কুল আজিলৈ প্ৰাদেশিকীকৰণ হোৱা নাই ৷ শিক্ষক তথা ছাত্ৰ-ছাত্ৰী সকলৰ মতে, চিৰাং জিলাৰ পাণবাৰী পৰীক্ষা কেন্দ্ৰৰ ভিতৰত প্ৰতি বছৰে সৰ্বোচ্চ নম্বৰ লাভ কৰা এইখন বিদ্যালয়ৰ পৰা হাইস্কুল শিক্ষান্ত পৰীক্ষাত ভাল ফলাফলেৰে ছাত্ৰ-ছাত্ৰী উত্তীৰ্ণ হয় যদিও আজিলৈ চৰকাৰে কোনো উচিত ব্যৱস্থা লোৱা নাই বিদ্যালয় খনৰ হকে ৷
ডিব্ৰুগড়ঃ ইয়াৰ বিপৰীতে ডিব্ৰুগড় চহৰৰ গ্ৰেহেম বজাৰৰ দীপক সংঘত দেখিবলৈ পোৱা গ'ল সৰস্বতী পূজাৰ ব্যতিক্ৰমী আয়োজন ৷ একাংশ ধৰ্মপ্ৰাণ ৰাইজৰ উদ্যোগত বীণাপাণিৰ পূজাৰ মণ্ডপ সাজিছে দূৰ্গা পূজাৰ দৰেই কলিকতাৰ কাৰিকৰ হাতৰ যাদুকৰী পৰশৰে ৷ দীপক সংঘৰ সৰস্বতী পূজাৰ সোণালী জয়ন্তী উপলক্ষে এইবাৰ বিশেষভাৱে 4 দিনীয়াকৈ আয়োজন কৰা হৈছে বাগদেৱীৰ পূজা ৷ 4 লাখ 70 হাজাৰ টকাৰ বাজেটেৰে আয়োজন কৰা এই পূজাৰ মণ্ডপ নিৰ্মাণৰ বাবে কলিকতাৰ পৰা অনা হৈছে কাৰিকৰ ৷ প্ৰতিষ্ঠা কৰা হৈছে 14 ফুট উচ্চতাৰ সৰস্বতীৰ মৃন্ময় প্ৰতিমা ৷
ৰূপহীহাটঃ ৰূপহীহাট আৰু জুৰীয়াতো সোমবাৰে বিভিন্ন শিক্ষানুষ্ঠানত উলহ মালহেৰে উদযাপিত হয় বিদ্যাৰ অধিষ্ঠাত্ৰী দেৱী সৰস্বতীৰ পূজা ৷ বৃহত্তৰ অঞ্চলটোৰ প্ৰায় প্ৰতিখন শিক্ষানুষ্ঠানতে বাগদেৱীৰ চৰনত সেৱা জনাই, ছাত্ৰ-ছাত্ৰীকে ধৰি অভিভাৱক সকলেও আশীৰ্বাদ বিচাৰে ৷
উল্লেখ্য যে, এইবাৰ সৰস্বতী পূজা দুদিনীয়াকৈ হোৱা বাবে কাইলৈয়ো প্ৰায় সংখ্যক বিদ্যালয়তে আয়োজন কৰা হ'ব বাগদেৱীৰ পূজা অৰ্চনা ৷
লগতে পঢ়ক ঃ মুক্তি পালে ফিল্মফেয়াৰ এৱাৰ্ড 2020ৰ প্ৰম'
