গুৱাহাটী, ২০ জুন: অসমৰ সমষ্টি পুনৰ নিৰ্ধাৰণ সন্দৰ্ভত মঙলবাৰে ভাৰতৰ নিৰ্বাচন আয়োগে প্রকাশ কৰিলে খচৰা প্ৰস্তাৱ । খচৰা প্ৰস্তাৱ অনুসৰি লোকসভা আৰু বিধানসভাত একেই থাকিব সমষ্টিৰ সংখ্যা । জুলাই মাহত খচৰা সন্দৰ্ভত হ’ব ৰাজহুৱা শুনানি । যাৰ বাবে জুলাই মাহত অসমলৈ আহিব নিৰ্বাচন আয়োগৰ দল । 11 জুলাইলৈকে আপত্তি দৰ্শাব পাৰিব এই খচৰা সন্দৰ্ভত ৷ এই খচৰা প্ৰস্তাৱ প্ৰকাশৰ পাচতেই স্বাভাৱিকতে ৰাজনৈতিক মহলত চৰ্চা হোৱা দেখা গৈছে ৷
নিৰ্বাচন আয়োগে জাৰি কৰা খচৰা প্ৰস্তাৱ সন্দৰ্ভত প্ৰতিক্ৰিয়া প্ৰকাশ কৰিছে শিৱসাগৰ সমষ্টিৰ বিধায়ক অখিল গগৈয়ে । নিজৰ প্ৰতিক্ৰিয়াত বিধায়ক অখিল গগৈয়ে কয় যে, আশংকা কৰা ধৰণে বিজেপি দলটোৰ পৰিকল্পনা মতেই সমষ্টি পুনৰ নিৰ্ধাৰণৰ খচৰা প্ৰকাশ পালে । বিজেপি দলৰ সুবিধা অনুসৰি তথা তেওঁলোক জয়ী হ'ব পৰাকৈ এই খচৰা প্ৰকাশ কৰা হৈছে ।
তেওঁ লগতে অভিযোগ কৰি কয় যে, বিজেপি দলে ইতিপূৰ্বে প্ৰস্তুত কৰা ড্ৰাফ্ট ৰিপ’ৰ্টটো আজি নিৰ্বাচন আয়োগে প্ৰকাশ কৰা ড্ৰাফ্ট ৰিপ’ৰ্টটোৰ সৈতে প্ৰায় একেই । ইয়াৰ পৰা এইটো অনুমান কৰিব পাৰি যে নিৰ্বাচন আয়োগে বিজেপিৰ শ্ৰুতলিপি অনুসৰি সমষ্টি পুনৰ নিৰ্ধাৰণৰ প্ৰক্ৰিয়াটো কৰিছে ।
লগতে পঢ়ক: Constituency delimitation: অসমৰ সমষ্টি পুনৰ নিৰ্ধাৰণৰ খচৰা প্ৰকাশ নিৰ্বাচন আয়োগৰ
গগৈয়ে আৰু কয় যে, সমষ্টি একেই আছে যদিও অনুসূচিত জনজাতিৰ সমষ্টিৰ সংখ্যা বৃদ্ধি কৰা হৈছে । অনুসূচিত জাতিৰ বাবেও সমষ্টি সংখ্যা বৃদ্ধি কৰা হৈছে । এই প্ৰক্ৰিয়াত খিলঞ্জীয়াৰ অধিকাৰ হ্ৰাস কৰিব বিচৰা হৈছে । ৰংঘৰ আৰু তলাতল ঘৰক শিৱসাগৰ সমষ্টিৰ পৰা কৰ্তন কৰিব বিচৰা হৈছে । এইটো শিৱসাগৰৰ ৰাইজে মানিব নে বুলি তেওঁ প্ৰশ্ন কৰে ।
উল্লেখ্য যে, নিৰ্বাচন আয়োগৰ নিৰ্দেশনা অনুসৰি ১৯ টা বিধানসভা সমষ্টি আৰু ২ টা লোকসভা সমষ্টি সংৰক্ষিত হ’ব অনুসূচিত জনজাতিৰ বাবে । পূৰ্বতে অনুসূচিত জনজাতিৰ বাবে সংৰক্ষিত আছিল ১৬টা বিধানসভা সমষ্টি । আনহাতে, অনুসূচিত জাতিৰ বাবে বিধানসভা সমষ্টিৰ সংখ্যা ৮ৰ পৰা ৯টালৈ বৃদ্ধি কৰা হৈছে ।
লোকসভাত ১টা সমষ্টি সংৰক্ষিত হ’ব অনুসূচিত জাতিৰ বাবে । পশ্চিম কাৰ্বি আংলঙত এটা বিধানসভা সমষ্টি বৃদ্ধি হয় অনুসূচিত জাতিৰ বাবে । আনহাতে, ডিফু আৰু কোকৰাঝাৰ লোকসভা সমষ্টি সংৰক্ষিত অনুসূচিত জনজাতিৰ বাবে । অসংৰক্ষিত হৈয়ে থাকিব লখিমপুৰ লোকসভা সমষ্টি । ধেমাজিত থাকিব এটা অসংৰক্ষিত বিধানসভা সমষ্টি । লগতে বৰাক উপত্যকাত থাকিব দুটাকৈ লোকসভা সমষ্টি ।
