গুৱাহাটী,8 ফেব্ৰুৱাৰীঃ 11ফেব্ৰুৱাৰীত দেশৰ সৰ্বোচ্চ ন্যায়ালয়ে কৃষক নেতা অখিল গগৈৰ জামিন সন্দৰ্ভত ৰায় প্ৰদান কৰিব ৷ ইতিমধ্যে অখিল গগৈৰ জামিন সম্পৰ্কত উচ্চতম ন্যায়ালয়ত যাৱতীয় সকলোবোৰ নথি-পত্ৰ প্ৰদান কৰিছে গগৈৰ অধিবক্তা হোচেফা আহমেদীয়ে ৷ সোমবাৰে সংবাদ মাধ্যমক এই কথা জানিবলৈ দিয়ে ৰাইজৰ দলৰ আহ্বায়ক জিতুল ডেকাই ৷
বৰ্তমান অৰ্থৰ অভাৱে চিন্তিত কৰি তুলিছে কৃষক মুক্তি সংগ্ৰাম সমিতি তথা ৰাইজৰ দলক ৷ জানিব পৰা মতে, অখিল গগৈৰ জামিন সন্দৰ্ভত হ’বলগা যাৱতীয় খৰচৰ বাবে কৃষক মুক্তি সংগ্ৰাম সমিতিৰ আহ্বানমৰ্মে ৰাইজে দিয়া দান-বৰঙণিৰে জমা হৈছিল প্ৰায় 20 লক্ষাধিক টকা ৷ কিন্তু সেই ধনৰাশি ইতিমধ্যে শেষ হৈছে ৷
উল্লেখযোগ্য যে, ৰাইজৰ দলৰ মৰাণত অনুষ্ঠিত প্ৰথমখন অধিৱেশনতে গগৈ মুকলি আকাশৰ তললৈ ওলাই অহাৰ সম্ভাৱনা ব্যক্ত কৰিছিল ৰাইজৰ দল তথা কৃষক মুক্তি সংগ্ৰাম সমিতিয়ে ৷ কিন্তু সকলোকে আচম্বিত কৰি অখিল গগৈৰ জামিন আবেদন অন্তিমবাৰৰ বাবে নাকচ কৰিছিল গুৱাহাটী উচ্চ ন্যায়ালয়ে ৷ তদুপৰি, গুৱাহাটী উচ্চ ন্যায়ালয়ত অখিল গগৈৰ হকে যুক্তি প্ৰদৰ্শন কৰিছিল দেশৰ উচ্চতম ন্যায়ালয়ৰ জ্যেষ্ঠ অধিবক্তা হোচেফ আহমেদীয়ে ৷ কিন্তু আহমেদীৰ যুক্তিত পতিয়ন নগৈ অখিল গগৈক পুনৰ কাৰাগাৰলৈ প্ৰেৰণ কৰিছিল গুৱাহাটী উচ্চ ন্যায়ালয়ে ৷
