গুৱাহাটী,15 ফেব্ৰুৱাৰী: 2021 ৰ বিধানসভা নিৰ্বাচনলৈ মাজত মাথো এটা মাহ বাকী ৷ নিৰ্বাচনৰ বাবে তৎপৰ হৈ পৰিছে ৰাজ্যৰ প্ৰতিটো ৰাজনৈতিক দল ৷ ৰাষ্ট্ৰীয় দল সমূহৰ সমান্তৰালকৈ নিৰ্বাচনলৈ কঁকালত টঙালি বান্ধিছে নৱ গঠিত আঞ্চলিক দল অসম জাতীয় পৰিষদে ৷
সোমবাৰে মহানগৰীৰ হোটেল প্ৰাগ কন্টিনেন্টেলত এখন গুৰুত্বপূৰ্ণ সংবাদমেলৰ আয়োজন কৰে অসম জাতীয় পৰিষদে ৷ সংবাদমেলৰ জৰিয়তে দলৰ বিত্তীয় ব্যৱস্থা শক্তিশালী কৰিবৰ বাবে জনগণৰ পৰা পুঁজি বিচাৰি আহ্বান জনাইছে দলটোৰ সভাপতি লুৰিণ জ্যোতি গগৈয়ে ৷
সংবাদমেলত নেতা গৰাকীয়ে ৰাইজৰ পৰা মাননি বিচাৰি উল্লেখ কৰে যে, জমা হোৱা সেই সকলো ধনৰাশিৰ তথ্য দলটোৰ ৱেবচাইটত প্ৰতি সপ্তাহে মুকলিকৈ প্ৰকাশ কৰা হ'ব ৷ লগতে দলটোক প্ৰয়োজনীয় পৰামৰ্শ দিবলৈ তথা অভাৱ অভিযোগ উত্থাপন কৰিবলৈ 18002702626 ট’ল ফ্ৰী নম্বৰত যোগাযোগ কৰাৰ আহ্বান জনাইছে লুৰিণ জ্যোতি গগৈয়ে ৷
লগতে নেতা গৰাকীয়ে উল্লেখ কৰে যে, যদি দলে 2021 ত দিছপুৰত চৰকাৰ গঠন কৰিবলৈ সক্ষম হয় তেন্তে এই ট’ল ফ্ৰী নম্বৰত ফোন কৰি সমস্যা জনালে সেইয়া সমাধান কৰা হ'ব ৷
লগতে সকলো জনসাধাৰণক 'জাতীয় সেৱক' হৈ অসমৰ প্ৰগতিত নিজৰ অৱদান আগবঢ়াবলৈ আহ্বান জনায় দলটোৱে মুকলি কৰিলে ৱেবচাইত ৷ sevak.assamjatiyaparishad.org এই ৱেবচাইটত নিজৰ মতামত দিবলৈ সোমবাৰে সংবাদমেলযোগে আহ্বান জনালে অসম জাতীয় পৰিষদৰ সভাপতি লুৰিণজ্যোতি গগৈয়ে ৷
সমান্তৰালভাৱে জাতীয় পৰিষদৰ পৰা আগন্তুক বিধানসভাৰ নিৰ্বাচনত প্ৰতিদ্বন্দিতা আগবঢ়াব বিচৰা আগ্ৰহী প্ৰাৰ্থী সকলক 25 ফেব্ৰুৱাৰীৰ ভিতৰত আবেদন জনাবলৈ আহ্বান জনাইছে লুৰিণজ্যোতিয়ে ৷ তাৰ বাবে প্ৰাৰ্থীসকলে জমা দিব লাগিব বিশ হাজাৰকৈ টকা ৷
লগতে পঢ়কঃ ৰাজ্যসভা নিৰ্বাচন: বিজেপিৰ প্ৰাৰ্থীৰূপে মনোনয়ন দাখিল বিশ্বজিৎ দৈমাৰীৰ
