গুৱাহাটী, ৬ আগষ্টঃ বহু সমীকৰণ আৰু ৰাজনৈতিক হিচাপ নিকাচৰ অন্তত বিজেপিৰ কেন্দ্ৰীয় নেতৃত্বই অনুমোদন জনোৱাৰ পিছত অলপতে ঘোষণা কৰা হৈছে দলটোৰ নতুন ৰাজ্যিক কাৰ্যনিৰ্বাহক সমিতিখন ৷ এইখন সমিতিৰ গুৰুত্ব এইবাবেই অধিক, কিয়নো 2021 ৰ বিধানসভা নিৰ্বাচন পৰিচালনা কৰাৰ গুৰু দায়িত্বভাৰ থাকিব এই সমিতিৰ ওপৰতে ৷ দলৰ কেন্দ্ৰীয় নেতৃত্বই পূৰ্বতেই স্পষ্ট কৰি দিছিল যে ৰাজ্যিক কাৰ্যনিৰ্বাহকত এইবাৰ সাধাৰণ সম্পাদক পদত অধিষ্ঠিত হোৱাসকলে কোনো কাৰণতে আগন্তুক বিধানসভা নিৰ্বাচনত অৱতীৰ্ণ হ’ব নোৱাৰিব ৷ সেই সূত্ৰ আগত ৰাখিয়েই সাধাৰণ সম্পাদক পদত নিযুক্তি দিয়া হৈছে দলটোৰ তিনিগৰাকীকৈ সাংসদক ৷ তেওঁলোক হৈছে ডাঃ ৰাজদ্বীপ ৰায়, তপন কুমাৰ গগৈ আৰু পল্লৱলোচন দাস ৷
বহু ৰাজনৈতিক অংক আগত ৰাখি গঠন কৰা এই নতুন সমিতিখনে আগন্তুক বিধানসভা নিৰ্বাচন অতি কৌশলপূৰ্ণ আৰু নিখুঁতভাবে পৰিচালনা কৰিবলৈ সক্ষম হ’ব বুলি মন্তব্য কৰিছে দলটোৰ নৱনিযুক্ত উপ-সভাপতি জয়ন্ত দাসে ৷ বিগত সুদীৰ্ঘ সময়জুৰি দিছপুৰ সমষ্টিৰ দাবীদাৰ হিচাপে থিয় হোৱা জয়ন্ত দাসে একে সময়তে ৰাজ্যিক বিজেপিৰ আভ্যন্তৰত লবীকেন্দ্ৰীক ৰাজনীতি চলি থকাৰ অভিযোগো একে আষাৰে খণ্ডন কৰে ৷
2021 চনত পুনৰ দিছপুৰত চৰকাৰ গঠন কৰাৰ লক্ষ্য আগত ৰাখিয়েই নতুন আৰু পুৰণি উভয় মুখক লৈ এই ৰাজ্যিক সমিতিখন দলৰ শীৰ্ষ নেতৃত্বই গঠন কৰি দিছে আৰু বিজেপি নিশ্চিতভাবে 2021 ত পুনৰ সেই লক্ষ্যত উপনীত হ’ব বুলিও মন্তব্য কৰে নৱনিযুক্ত উপ-সভাপতি গৰাকীয়ে ৷ মনকৰিবলগীয়া যে, সদ্যঘোষিত ৰাজ্যিক কাৰ্যনিৰ্বাহক সমিতিখনত মুখ্যমন্ত্ৰী সৰ্বানন্দ সোণোৱাল আৰু স্বাস্থ্য মন্ত্ৰী ডঃ হিমন্তবিশ্ব শৰ্মাৰ শিবিৰৰ বুলি পৰিচিত কেইবাজনো নেতাক সন্তুলন ৰক্ষা কৰি অন্তৰ্ভুক্ত কৰা হৈছে ৷
লগতে পঢ়কঃ ভাৰতত কৰ’ণা ভাইৰাছত এদিনতে আক্ৰান্ত সৰ্বাধিক 56,282 গৰাকী
