গুৱাহাটী, ৬ অক্টোবৰ: ৰাজ্যৰ পাঁচটা বিধানসভা সমষ্টিত ৩০ অক্টোবৰত উপ-নিৰ্বাচন অনুষ্ঠিত হ'ব । আনহাতে মাজুলী সমষ্টিতো উপ-নিৰ্বাচন অনুষ্ঠিত হ'ব যদিও এতিয়াও দিন ঘোষণা কৰা হোৱা নাই । ইতিমধ্যে, প্ৰতিটো দলেই ব্যাপক তৎপৰতাৰে নিৰ্বাচনী যুঁজত অৱতীৰ্ণ হোৱাৰ বাবে সাজু হৈছে । বিভিন্ন দলে প্ৰাৰ্থী তালিকাও প্ৰকাশ কৰিছে ।
বিধানসভা নিৰ্বাচনৰ পূৰ্বে জন্ম লাভ কৰা অসম জাতীয় পৰিষদ আৰু ৰাইজৰ দলো উপ-নিৰ্বাচনৰ বাবে সাজু হৈ ৰণকৌশল যুগুত কৰিছে । সমষ্টিকেইটাৰ আসন দখল কৰিবলৈ শাসক-বিৰোধী উভয় পক্ষই ৰণনীতি প্ৰস্তুত কৰিছে । কংগ্ৰেছ, বিজেপি, ৰাইজৰ দল, ইউ পি পি এলে ঘোষণা কৰিছে তেওঁলোকৰ প্ৰাৰ্থী । কিন্তু আশ্চৰ্যজনকভাৱে এই উপ-নিৰ্বাচনক কেন্দ্ৰ কৰি ৰাজ্যৰ আঞ্চলিকতাবাদী ৰাজনৈতিক দল তথা বিজেপি মিত্ৰজোঁটৰ অসম গণ পৰিষদৰ নাই কোনো প্ৰস্তুতি ।
বিজেপিৰে মিত্রতাৰ বান্ধোনত আৱদ্ধ হৈ পৰা অগপৰ যেন অস্তিত্বই নোহোৱা হৈ পৰিল । মাজুলীকে ধৰি উপ-নিৰ্বাচন অনুষ্ঠিত হ'বলগীয়া থাওৰা, মৰিয়নি, ভৱানীপুৰ, তামুলপুৰ আৰু গোসাঁইগাঁও সমষ্টিত এসময়ত অগপৰ সবল ভেঁটি আছিল । কিন্তু বৰ্তমান এই আটাইকেইটা সমষ্টিতে অগপৰ প্ৰাৰ্থীত্ব প্ৰদান কৰাটো দূৰৰে কথা, নাই কোনো সাংগঠনিক কুচ-কাৱাজ ।
লক্ষণীয় বিষয় যে, কিছুদিন পূৰ্বে সংবাদ মাধ্যমৰ আগত অগপৰ সভাপতি তথা মন্ত্রী অতুল বৰাই কৈছিল যে পূৰ্বে এই ছয়খন আসনতেই অগপই জয় লাভ কৰিছিল । কিন্তু এতিয়া এই সমষ্টিকেইটাত অগপই জয়লাভ কৰিব নোৱাৰে । এইদৰেই এসময়ৰ শক্তিশালী আঞ্চলিক দলটোৱে এতিয়া অসহায় হৈ প্ৰাৰ্থিত্ব প্ৰদানৰ পৰা আঁতৰি আহিছে । সভাপতি বৰাই কয় যে, জনগাঁথনি সলনি হৈছে সমষ্টিসমূহৰ ।
সেয়ে, তেওঁলোক জয়ী হ'ব নোৱাৰে । আসন দাবী কৰা আৰু প্ৰতিদ্বন্দিতা কৰাটো ডাঙৰ কথা নহয় । দুটাকৈ কাৰ্যকালৰ বাবে অসমৰ শাসনৰ বাঘজৰী লাভ কৰা অগপ এতিয়া ৰাষ্ট্ৰীয় দল বিজেপিৰ গ্ৰাসত পৰিছে । এসময়ৰ অসমৰ শাসন নিজৰ হাতলৈ নিবলৈ সক্ষম হোৱা শক্তিশালী আঞ্চলিকতাবাদী শক্তি হিচাপে পৰিচিত হোৱা অগপৰ আজিৰ এই অৱস্থাই এতিয়া আঞ্চলিকতাবাদী মনোভাৱাপন্ন লোকসকলৰ মাজত প্ৰতিক্ৰিয়াৰ সৃষ্টি কৰিছে ।
পূৰ্বে নিজৰ দখলত ৰখা এই সমষ্টিত এতিয়া অগপই বিনা প্ৰতিদ্বন্দিতাৰে পূৰ্বেই নিজৰ পৰাজয় স্বীকাৰ কৰি লোৱা কাৰ্যই দলটোৰ চৰম বিপৰ্যয়ৰ কথাকেই প্ৰমাণ কৰিছে বুলি চৰ্চা চলিছে । উল্লেখ্য যে, অগপই একমাত্ৰ দল, যিটো দলৰ বিধায়ককে পূৰ্বে এই ৬টা সমষ্টিতে জয়ী হৈছিল । ভৱানীপুৰ সমষ্টিত অভিলেখ সংখ্যক চাৰিবাৰ অগপ প্ৰাৰ্থী জয়ী হৈছিল । মাজুলী সমষ্টিতো চাৰিবাৰ জয় হৈছিল অগপ প্ৰাৰ্থী ।
সেইদৰে গোসাঁইগাঁও আৰু থাওৰাৰ অগপ বিধায়কে মন্ত্ৰিত্ব লাভ কৰিছিল । আনহাতে, তামুলপুৰত ভৱেন নাৰ্জাৰী আৰু মৰিয়নিত নৰেন তাঁতী অগপৰ বিধায়ক আছিল । কিন্তু সেই অগপ দলে বৰ্তমান এইকেইটা সমষ্টিত নিজৰ প্ৰাৰ্থী দিবলৈ সাহস কৰা নাই । অগপৰ বাবে ইয়াতকৈ আৰু কি বিপৰ্যয় হ'ব পাৰে ।
