গুৱাহাটী,21 মাৰ্চ: মেখেলা চাদৰক অনন্য ৰূপ প্ৰদান কৰি জনপ্ৰিয়তা লাভ কৰা ডিজাইনাৰ সংযুক্তা দত্তই এইবাৰ লেকমী ফেশ্বন উইকত দেওবাৰে প্ৰদৰ্শন কৰে তেওঁৰ নতুন সংগ্ৰহ ‘শুকুলা’ । ফেশ্বন তথা বলীউড সুন্দৰী লাৰা দত্তক সংযুক্তাৰ শেহতীয়া ডিজাইনৰ পোচাক পৰিধানেৰে ৰেম্পত অতি মোহনীয়া আৰু আকৰ্ষণীয় ৰূপত দেখা যায় ৷
এই সন্দৰ্ভত সংযুক্তা দত্তই কয় যে, ‘‘লেকমী ফেশ্বন উইকত মোৰ শেহতীয়া ডিজাইনৰ পোচাক প্ৰদৰ্শন কৰি অতিকৈ উৎসাহিত তথা আনন্দিত । সকলো প্ৰতিষ্ঠিত তথা প্ৰখ্যাত ডিজাইনাৰৰ বাবে তেওঁলোকৰ সৃষ্টিৰাজি প্ৰদৰ্শন কৰাৰ বাবে লেকমী ফেশ্বন উইক এক উত্তম প্লেটফৰ্ম । তেওঁলোকৰ মাজত মোৰ সংগ্ৰহখিনি প্ৰদৰ্শন কৰিব পৰাতো মোৰ বাবে যেনেদৰে গৌৰৱৰ কাৰণ, ঠিক তেনেদৰে এক প্ৰত্যাহ্বানো’’ ।
লগতে তেওঁ কয় কয়, ‘‘লাৰা দত্তৰ সৈতে কাম কৰাতো এক আনন্দদায়ক অভিজ্ঞতা । মোৰ নতুন সংগ্ৰহ ‘শুকুলা’ অৰ্থাৎ উজ্জ্বল শুধ বগা যেন শান্তি আৰু পবিত্ৰতাৰ এক বাংময় প্ৰকাশ’’ ।
আনহাতে সংযুক্তাৰ সংগ্ৰহৰ বিষয়ে লাৰা দত্তই কয় যে, ‘‘সংযুক্তাৰ এই সংগ্ৰহ ‘শুকুলা’ যেন সূতাৰে বোৱা এক কবিতা, য’ত অলেখ কাহিনী গাঁঠি থোৱা আছে । সেয়া যেন পৱিত্ৰ, শান্ত যদিও উজ্জ্বল এক প্ৰকাশ’’।
লগতে পঢ়ক : গন্ধমৌত দুষ্প্ৰাপ্য বনৰৌ উদ্ধাৰ
