গুৱাহাটী, ১ এপ্ৰিল : প্ৰধানমন্ত্রী আৱাস যোজনাৰ অধীনত ২০২৩ চনৰ ৩১ আগষ্টৰ ভিতৰত ৰাজ্যত ১২ লাখ ঘৰ নতুনকৈ নিৰ্মাণ কৰা হ'ব । ৰাজ্য চৰকাৰৰ পঞ্চায়ত আৰু গ্ৰামোন্নয়ন বিভাগে এই লক্ষ্য আগত ৰাখি ইতিমধ্যে কাম আৰম্ভ কৰিছে । এই সন্দৰ্ভত শুকুৰবাৰে এক পৰ্যালোচনা বৈঠকত এনেদৰে মন্তব্য কৰে বিভাগীয় মন্ত্রী ৰণজিৎ কুমাৰ দাস(12 lakh new houses of PMAY to be constructed within a year) ।
তেওঁ কয় যে, কেন্দ্ৰীয় চৰকাৰে ইতিমধ্যে প্ৰধানমন্ত্ৰী আৱাস যোজনা(গ্ৰামীণ)ৰ অধীনত অসমলৈ মুঠ ১২,০২,২৩৭ টা গৃহৰ নতুনকৈ আৱন্টন দিছে । ২০২৩ চনৰ ৩১ আগষ্ট ভিতৰত পঞ্চায়ত আৰু গ্ৰামোন্নয়ন বিভাগে এই ১২ লাখ গৃহৰ নিৰ্মাণৰ কাম সম্পূৰ্ণ কৰাৰ বাবে লক্ষ্য নিৰ্ধাৰণ কৰিছে ।
গুৱাহাটীৰ পাঞ্জাবাৰীস্থিত অসম ৰাজ্যিক গ্ৰামীণ জীৱিকা অভিযান(Assam State Rural Livelihood Mission)ৰ কাৰ্যালয়ৰ সভাগৃহত আয়োজন কৰা পৰ্যালোচনা বৈঠকত পঞ্চায়ত আৰু গ্ৰামোন্নয়ন বিভাগ(Panchayat and Rural Development Department)ৰ বিষয়াসকল উপস্থিত থাকে ।
বৈঠকত সমগ্ৰ বিষয়টোৰ ওপৰত বিস্তৃত আলোচনা কৰাৰ লগতে আগন্তুক কাৰ্যপন্থাৰ ৰূপৰেখা প্ৰস্তুত কৰা হয় । লগতে নিৰ্ধাৰিত সময়ত নিৰ্মাণৰ কাম সম্পূৰ্ণ কৰিবলৈ ল'বলগীয়া সকলো যাৱতীয় ব্যৱস্থা সুুপৰিকল্পিতভাৱে সাজু কৰিবলৈ মন্ত্রীগৰাকীয়ে বিষয়াকলক নিৰ্দেশ দিয়ে ।
তেওঁ কয় যে, সকলোৰে ঐক্যবদ্ধ প্ৰচেষ্টাত আমি নিৰ্ধাৰিত সময়ৰ পূৰ্বেই এই লক্ষ্যত উপনীত হ'ব পাৰিম ৷ বৈঠকত অসম ৰাজ্যিক গ্ৰামীণ জীৱিকা অভিযানৰ অধীনত ৰূপায়িত হৈ থকা বিভিন্ন কাম-কাজৰো মন্ত্রীগৰাকীয়ে পৰ্যালোচনা কৰে । পৰ্যালোচনা বৈঠকত পঞ্চায়ত আৰু গ্ৰামোন্নয়নৰ প্ৰধান সচিব ড° জে.বি. এক্কা, আয়ুক্ত বিক্ৰম কৈৰী, অসম ৰাজ্যিক গ্ৰামীণ জীৱিকা অভিযানৰ ৰাজ্যিক মিছন সঞ্চালিকা কৃষ্ণা বৰুৱাকে প্ৰমুখ্য কৰি বিভাগীয় বিষয়াসকল উপস্থিত থাকে ।
লগতে পঢ়ক : Assam Rajya Sabha election result 2022 : দুয়োখন আসনতে জয়লাভ বিজেপি মিত্ৰজোঁটৰ
