যোৰহাট, 18 মেঃ চৰকাৰী অৱহেলাত জহি-খহি যাবলৈ লৈছে ব্ৰিটিছ যুগৰ স্বাক্ষৰ বহনকাৰী আপুৰুগীয়া সম্পদ ৷ যোৰহাট জিলাৰ গড়মূৰৰ অভিযান্ত্ৰিক মহাবিদ্যালয়ৰ সন্মুখত থকা গড়কাপ্টানী বিভাগৰ আৱাসিক এলেকাত অৱহেলিত হৈ পৰি ৰৈছে ব্ৰিটিছে পথ নিৰ্মাণকাৰ্যত ব্যৱহাৰ কৰা এখন ঐতিহাসিক ৰ'ড ৰোলাৰ ৷ বহু সোণালী অতীতৰ গৌৰৱময় গাঁথা বহন কৰি অহা এইসমূহ আপুৰুগীয়া সম্পদ সংৰক্ষণৰ অভাৱ তথা চৰকাৰ আৰু সংশ্লিষ্ট বিভাগৰ অনীহাৰ ফলত এতিয়া জহি খহি যাবলৈ লৈছে ৷
যোৰহাটত থকা এইখন ব্ৰিটিছ যুগৰে কয়লাৰে চালিত এইখন ৰ'ড ৰোলাৰ এতিয়া মাথোঁ স্মৃতিৰ গৰাহত ৷ ইতিমধ্যেই কালৰ সোঁতত বহু ঐতিহাসিক সম্পদ নিঃশেষ হৈ পৰিছে যদিও যিখিনি বাকী আছে সেইখিনিও এতিয়া হেৰাই যোৱাৰ উপক্ৰম হৈছে ৷ সংৰক্ষণৰ অভাৱত জহি-খহি যাবলৈ লোৱা ৰলাৰখন শীঘ্ৰেই সংৰক্ষণৰ ব্যৱস্থা কৰি পৰৱৰ্তী প্ৰজন্মৰ বাবে সঞ্চিত কৰিবলৈ দাবী উত্থাপন কৰিছে স্থানীয় ৰাইজে ৷
