যোৰহাট, ১৫ জুন : মুখ্যমন্ত্ৰী ড৹ হিমন্ত বিশ্ব শৰ্মা (Himanta Biswa Sarma)ই বিদ্যুৎ মাচুল আদায়ক লৈ কঠোৰ নিৰ্দেশনা জাৰি কৰাৰ পাছতেই যোৰহাট বিদ্যুৎ সংমণ্ডলে কেতবোৰ গুৰুত্বপূৰ্ণ তথ্য প্ৰকাশ কৰিছে । এই তথ্য অনুসৰি, যোৰহাট সংমণ্ডলে এতিয়াও পাবলৈ বাকী আছে ১১৪ কোটি টকা বিদ্যুৎ মাচুল (ELECTRICITY BILL) ।
এই ১১৪ কোটি টকাৰ ভিতৰত ১২ কোটি ৪৩ লাখ টকা আদায় দিবলৈ বাকী আছে যোৰহাট সংমণ্ডলৰ অন্তৰ্ভুক্ত এ টি চিৰ চাহ বাগিচাসমূহে । আনহাতে, যোৰহাট, মাজুলী, দেৰগাঁৱৰ বিভিন্ন বিভাগৰ চৰকাৰী কাৰ্যালয়ে পৰিশোধ কৰিবলৈ বাকী আছে প্ৰায় ৫ কোটি ৩৫ লাখ টকা ।
যোৰহাট, তিতাবৰ, মৰিয়নী, দেৰগাঁও পৌৰসভা আদিয়ে মুঠ আদায় দিবলগীয়া ধনৰ পৰিমাণ ৯৫,৬৯,০০০ টকা । বন বিভাগে বিদ্যুৎ মাচুল দিবলৈ বাকী আছে ৪,৩০,৯৬০ টকা । আৰক্ষীয়ে বিদ্যুৎ মাচুল দিবলৈ আছে ৭৯,২৫,৭৭৩ টকা । জনস্বাস্থ্য কাৰিকৰী বিভাগে (PUBLIC HEALTH ENGINRRING) বিদ্যুৎ মাচুল দিবলৈ আছে ২ কোটি ৫০ লাখ, ৩৭ হাজাৰ টকা ।
জলসিঞ্চন (Irrigation) বিভাগে পৰিশোধ কৰিবলগীয়া বিদ্যুৎ মাচুল হৈছে ৭৩,৩৫,৭০১ টকা । লোক নিৰ্মাণ বিভাগে (PWD) পৰিশোধ কৰিবলৈ আছে ৪,১৩,০০০ টকা । পঞ্চায়ত আৰু গ্ৰামোন্নয়ন বিভাগৰ কাৰ্যালয়ে দিবলৈ বাকী আছে ৯,৬০,৪৫৪ টকা ।
ব্ৰহ্মপুত্ৰ নিৰ্মল ৱাটাৰ চাপ্লায়ে আদায় দিবলগীয়া ধনৰ পৰিমাণ ৩১ লাখ টকা । আনহাতে, বিভাগটোৱে পাবলগীয়া ঘৰুৱা মাচুল (১-৫ কিলোৱাটৰ ভিতৰৰ) ৬০ কোটি টকা । ২০১৯-২০ বৰ্ষত প্ৰায় ২১ কোটি টকাৰ লোকচান হোৱাৰ বিপৰীতে ২০২০-২১ত এপ্ৰিল মাহলৈকে ১৪ কোটি টকাৰ লোকচানৰ সন্মুখীন হৈছে ।
