টীয়ক,12 আগষ্ট: ব্ৰহ্মপুত্ৰৰ বাঢ়নী পানীয়ে প্ৰতিবছৰে প্লাৱিত কৰি অহা পূৱ যোৰহাট আৰু টীয়ক ৰাজহ চক্ৰৰ অধীনস্থ অঞ্চল সমূহলৈ সু-খবৰ ৷ ৰাজ্যৰ জলসম্পদ মন্ত্ৰী কেশৱ মহন্তৰ নিৰ্দেশ অনুসৰি টীয়কৰ জাঁজীমুখৰ চকুলো মেলেংছিগাত এখন শ্লুইজ গেট নিৰ্মাণৰ বাবে আৰম্ভ হৈছে চৰকাৰী যো-জা ৷ মন্ত্ৰী গৰাকীৰ নিৰ্দেশ মৰ্মে সোমবাৰে উক্ত অঞ্চলত উপস্থিত হৈ পৰিদৰ্শনৰ লগতে জৰীপ চলায় জলসম্পদৰ কাৰ্যবাহী অভিযন্তা দিগন্ত শৰ্মাৰ নেতৃত্বত অহা এটা অভিযন্তাৰ দলে ৷
উল্লেখ্য যে, যোৰহাট জিলাৰ টীয়ক বিধান সভা সমষ্টিৰ অন্তৰ্গত মেলেংছিগাৰ মুক্ত অংশয়েদি প্ৰতি বছৰে ব্ৰহ্মপুত্ৰৰ বাঢ়নী পানী সোমাই বৃহত্তৰ জাঁজীমুখ অঞ্চলৰ জনজীৱন বিপৰ্যস্ত কৰি আহিছে ৷ সমষ্টিটোৰ অন্তৰ্গত পূৱ যোৰহাট আৰু টীয়ক ৰাজহ চক্ৰৰ অধীনস্থ প্ৰায় 20/25 খন গাঁৱৰ আৱাসিক অঞ্চল, ঘৰ দুৱাৰ, কৃষি ভূমি প্ৰতিবছৰে প্লাৱিত কৰাত যমৰ যাতনা ভোগ কৰি আহিছে অঞ্চল বাসীয়ে ৷ দীৰ্ঘ দিনীয়া এই সমস্যাটো সমাধানৰ বাবে যোৰহাট জিলা ছাত্ৰ সন্থাকে ধৰি বিভিন্ন দল সংগঠনে দাবী জনায় অহাৰ পাছতো জনপ্ৰতিনিধি সকলৰ অকৰ্মণ্যতাৰ বাবে এই দাবীৰ প্ৰতি কোনো গুৰুত্ব আৰোপ কৰা নাছিল ৷ শেহতীয়াকৈ জলসম্পদ বিভাগৰ মন্ত্ৰী কেশৱ মহন্তই যোৰহাট জিলা লৈ চৰকাৰী কাৰ্যসূচীত অহাৰ সময়তে জিলাখনৰ বিভিন্ন সমস্যাৰ লগতে টীয়কৰ জাঁজীমুখৰ চকুলো মেলেংছিগাত এখন শ্লুইজ গেট নিৰ্মাণৰ বাবে দাবী জনায় এখন স্মাৰক পত্ৰ দিছিল যোৰহাট জিলা ছাত্ৰ সন্থাই ৷ উক্ত দাবীৰ প্ৰতি সঁহাৰি জনায় তৎকালে উক্ত স্থানত শ্লুইজ গেট নিৰ্মাণৰ বাবে জৰীপ কৰাৰ নিৰ্দেশনা দিয়ে যোৰহাট জলসম্পদ বিভাগক ৷ তাৰ পাছতেই আজি উক্ত স্থানত উপস্থিত হৈ জৰীপ চলায় জলসম্পদৰ কাৰ্যবাহী অভিযন্তাৰ দলটোৱে ৷ উল্লেখ্য যে, জৰীপৰ সময়চোৱাত অভিযন্তাৰ দলটোৰ লগত উপস্থিত থাকে ছাত্ৰ সন্থাৰ বহু কেইজন কৰ্মী ৷
