যোৰহাট,15 মাৰ্চ : তৃণমূল কৰ্মীক সম্পূৰ্ণ অন্ধকাৰত ৰাখি বিজেপিৰে পুনৰ মিত্ৰতাক লৈ যোৰহাট জিলাৰ অসম গণ পৰিষদৰ কাৰ্যালয়ত জিলা সমিতি আৰু তৃণমূল পৰ্যায়ৰ কৰ্মীৰ সভা । এই সভাত বিজেপিৰ সৈতে মিত্ৰতা কৰা নেতৃত্বক ধিক্কাৰ দিয়াৰ লগতে অতি শীঘ্ৰে অসম গণ পৰিষদৰ পৰা পদত্যাগ কৰাৰ দাবী জনায় যোৰহাট জিলা সমিতিয়ে ।
উল্লেখ্য যে,যোৰহাট জিলা কাৰ্যালয়ৰ শোভা বৰ্ধন কৰা কেন্দ্ৰীয় নেতৃত্ব অতুল বৰা ,কেশৱ মহন্ত, ফনীভূষণ চৌধুৰী , ৰমেন্দ্ৰ নাৰায়ণ কলিতাৰ ফটো জাৱৰৰ দ'মলৈ দলিয়াই দাহ কৰি প্ৰতিবাদ সাব্যস্ত কৰে তৃণমূল কৰ্মীয়ে ।
কেৱল এয়াই নহয়,অসম গণ পৰিষদ দলৰ মুষ্টিমেয় নেতৃত্বই বিজেপিৰ লগত কৰা নিৰ্বাচনী মিত্ৰতাক এক অগণতান্ত্ৰিক,চৰম সুবিধাবাদী বুজাপৰা বুলি অভিহিত কৰে যোৰহাট জিলা সমিতিৰ কৰ্মীসকলে । ৰাজ্যিক কাৰ্যনিবাহক ঐকমত্যৰ বিপৰীতে একাংশ নেতৃত্ব আৰু জিলাসমূহৰ কেতবোৰ স্তাবকৰ সমৰ্থনত মিত্ৰতাৰ বাবে অগ্ৰসৰ হোৱা নেতৃত্বই মাজনিশা হোৱা চুক্তিৰ দফাসমূহ শীঘ্ৰে ৰাজহুৱা কৰাৰ দাবী জনায় কৰ্মীসকলে ৷
আনহাতে মিত্ৰতা সন্দৰ্ভত জিলা সমিতিৰ হৈ জিলা সভাপতি আৰু সম্পাদকদ্বয়ে কি পৰামৰ্শ অগপ নেতৃত্বক দিলে অথবা প্ৰস্তাৱ দিলে লগতে জিলা কাৰ্যনিৰ্বাহক অনুষ্ঠিত নকৰাকৈ কেনেকৈ মিত্ৰতাৰ প্ৰতি সমৰ্থন আগবঢ়ালে ,এই বিষয়ে স্থিতি স্পষ্ট কৰিবলৈও দাবী জনায় জিলা কাৰ্যনিৰ্বাহক সভাই ৷
