যোৰহাট, 8 জানুৱাৰী : 14 ডিচেম্বৰৰ নিশা 7.21 বজাত বাইকত অহা দুই যুৱকে লিচুবাৰী সেনা ছাউনীৰ 41 নং উপ অঞ্চলৰ সেনাৰ প্ৰৱেশদ্বাৰৰ সন্মুখত গ্ৰেণেড বিস্ফোৰণ সংঘটিত কৰি ঘটনাস্থলীৰ পৰা নিবিৰ্ঘ্নে আতঁৰি গৈছিল ৷ অৱশেষত বিভিন্ন তথ্য আৰু অনুসন্ধানৰ ভিত্তিত যোৰহাট আৰক্ষীয়ে এই ঘটনা সন্দৰ্ভত 28 ডিচেম্বৰত মৰাণৰ পৰা অচ্যুত গগৈ আৰু তিতাবৰৰ বৰহোলাৰ পৰা বিৰাজ কছাৰীক গ্ৰেপ্তাৰ কৰিছিল ৷ বৰ্তমান দুয়োজন জেল হাজোতত আছে ৷ উল্লেখ্য যে, যোৰহাটৰ সেনা ছাউনীত হোৱা গ্ৰেণেড বিস্ফোৰণ সন্দৰ্ভত আজি এক সংবাদমেল সম্বোধন কৰে যোৰহাটৰ আৰক্ষী অধীক্ষকে ৷
আনহাতে বিৰাজ কছাৰী আৰু অচ্যুত গগৈক টিয়কত লিচুবাৰী সেনা ছাউনীত বিস্ফোৰণৰ বাবে গ্ৰেণেড যোগান ধৰা দুই যুৱকক ডিমৌ আৰক্ষী থানাৰ অন্তৰ্গত নিতাইপুখুৰীৰ পৰা গ্ৰেপ্তাৰ কৰিবলৈ সক্ষম হয় ৷ যোৰহাট আৰক্ষীৰ হাতত দেওবাৰে নিশা গ্ৰেপ্তাৰ হোৱা দুই যুৱকদ্বয় হ’ল ক্ৰমে ৰাজপাল গগৈ আৰু বিপ্লৱ বৰুৱা ৷ এই কথা আজি সংবাদমেল যোগে আনুষ্ঠানিক ভাৱে প্ৰকাশ কৰে যোৰহাটৰ আৰক্ষী অধীক্ষক মোহন লাল মিনাই ৷
