টীয়ক, 10 জুলাইঃ শুকুৰবাৰে কৃষকনেতা অখিল গগৈৰ গৃহত উপস্থিত হয় ৰূপহীহাট সমষ্টিৰ বিধায়ক নুৰুল হুদা ৷ যোৰহাটৰ লুখুৰাসন গাঁওস্থিত কৃষক নেতা গৰাকীৰ বাসগৃহত উপস্থিত হৈ তেওঁৰ অসুস্থ বৃদ্ধা মাতৃৰ স্বাস্থ্যৰ বুজ লয় বিধায়ক গৰাকীয়ে ৷ এগৰাকী মাতৃৰ সন্তান হিচাপে কৃষক নেতা গৰাকীৰ মাতৃৰ বৰ্তমান স্থিতি সহ্য কৰিব নোৱাৰি বিধায়ক গৰাকীয়ে অখিল গগৈৰ গৃহত উপস্থিত হয় বুলি জানিবলৈ দিয়ে ৷ বিধায়ক গৰাকীয়ে উল্লেখ কৰা অনুসৰি, পিতৃৰ চিন্তাত সম্প্ৰতি অধিক অৱনতি ঘটিছে কৃষক নেতা গৰাকীৰ মাতৃৰ স্বাস্থ্য ৷
মাতৃৰ মনৰ বেদনা বুজি যাতে কৃষক নেতা অখিল গগৈক শীঘ্ৰে মুকলি কৰি দিয়া হয়, তাৰ বাবে অসমৰ মুখ্যমন্ত্ৰী সৰ্বানন্দ সোণৱালক তেওঁ অনুৰোধ জনায় ৷ লগতে কংগ্ৰেছ দলৰ পৰা উচ্চতম ন্যায়লয়ত অধিবক্তা মোতায়েন কৰি ইয়াৰ বিহীত ব্যৱস্থা লোৱাৰ ব্যৱস্থা কৰিছে বুলি উল্লেখ কৰে বিধায়ক নুৰুল হুদাই ৷ ইয়াৰোপৰি বিধায়ক গৰাকীয়ে, কাৰাগাৰত কেনেদৰে কৰ'ণা মহামাৰীৰ সংক্ৰমণ হ'বলৈ পালে সেই বিষয়ে আশ্বৰ্য প্ৰকাশ কৰে ৷ উল্লেখ্য যে নাগৰিকত্ব সংশোধনী বিধেয়ক বিৰোধী আন্দোলনৰ সময়ৰ পৰাই ভিন্ন অভিযোগত অখিল গগৈ, বিতু সোণোৱাল, ধৈৰ্য কোঁৱৰ আদিকে ধৰি কেইবাগৰাকীও লোকক কাৰাবন্দী কৰি ৰখা হৈছে ৷
লগতে পঢ়কঃ ৰাইজৰ গাঠিৰ ধনেৰে পুঠিমাৰী নৈক বাধা দিয়াৰ চেষ্টা গোৰেশ্বৰত
