যোৰহাট, 31 জুলাইঃ উজনি অসম প্ৰতিবন্ধী সুৰক্ষা পৰিষদৰ পথ অৱৰোধ কায্যসূচীত স্থৱিৰ হৈ পৰিল যোৰহাটৰ ৰাষ্ট্ৰীয় ঘাইপথ। যোৰহাটৰ অজন্তা বাইপাছ তিনিআলিত নায্যপ্ৰাপ্তিৰ দাবীত কৰা প্ৰতিবাদী কাৰ্যসূচী ৰূপায়ণ কৰে প্ৰায় শতাধিক প্ৰতিবন্ধী প্ৰতিবাদকাৰীয়ে ৷ দীৰ্ঘদিন ধৰি বিভিন্ন সমস্যা সমাধানৰ বাবে ৰাজ্য চৰকাৰক অনুৰোধ কৰি আহিছিল প্ৰতিবন্ধী সকলে৷
বৰ্তমানেও কাৰ্যকৰী ক্ষেত্ৰত দৃঢ় পদক্ষেপ গ্ৰহণ নকৰাৰ ফলতেই পথ অৱৰোধৰ দৰে কাৰ্যসূচী গ্ৰহণ কৰিবলৈ বাধ্য হ'ল এই সকল প্ৰতিবন্ধী লোক । বিভিন্ন দাবীৰে যোৰহাটত জিলা উপায়ুক্তৰ যোগেদি ৰাজ্যৰ মুখ্যমন্ত্ৰী, সমাজ কল্যাণ মন্ত্ৰী, গৃহ সচিব,সমাজ কল্যাণ সচিবলৈ স্মাৰক প্ৰত্ৰ প্ৰেৰণ কৰে । প্ৰতিবাদস্থলীৰ পৰা দিব্যাংগ প্ৰতিবাদকাৰীসকলে অসম চৰকাৰৰ বিভিন্ন বিভাগত খালী হৈ থকা ৮৬৮ টা পদ শীঘ্ৰে পূৰণৰ দাবী তোলে৷ লগতে ৯ জুনত পতা পৰীক্ষাৰ প্ৰশ্ন কাকত ফাদিল কৰা দোষী ব্যক্তিক শীঘ্ৰে গ্ৰেপ্তাৰ কৰাৰ দাবী তোলে৷ উল্লেখযোগ্য যে অতি শীঘ্ৰে দাবী সমূহ পূৰণ নকৰিলে ৰাজ্য চৰকাৰৰ বিৰুদ্ধে জংগী আন্দোলনৰ ভাবুকি প্ৰতিবাদকাৰীৰ৷
