যোৰহাট,15 জানুৱাৰী: ভোগালী বিহুৰ উৰুকা নিশা চোৰ কৰাটো এটা পৰম্পৰা । কিন্ত উৰুকাৰ নিশা চোৰ কৰিবলৈ আহি চোৰৰ লাগিল কেনা । মৰিয়নিৰ চেলেং গড়কোষত এঘৰত ছাগলী চুৰ কৰিবলৈ আহি বিপদত পৰিল এটা চোৰ। চেলেং গড়কোষৰ তিলক গগৈ নামৰ এজন ব্যক্তিৰ ঘৰত ছাগলী চুৰ কৰিবলৈ আহিছিল চোৰটো । ব্যক্তিজনৰ ঘৰৰ চৌহদত থকা ছাগলীৰ গড়ালৰ পৰা চোৰে এটা ছাগলী চুৰ কৰি নিবলৈ লওতেই ছাগলীৰ চিঞৰত গৃহস্থই সাৰ পাই চিঞৰ বাখৰ কৰে । চোৰে ছাগলী সহ পলাবলৈ সক্ষম হয় যদিও ছাগলী চোৰৰপকেটৰ পৰা গৃহস্থৰ চোতালত পৰি থাকি গ'ল ম'বাইল ফোন । পিচত ম'বাইলটোত পোৱা গ'ল ছাগলী চোৰৰ চেল্ফী ।
আনহাতে চোৰটোৱে ম'বাইল ফোনটো ঘুৰাই বিচাৰি গৃহস্থলৈ বাৰে বাৰে ফোন কৰি আছে । গৃহস্থই চোৰক চুৰ কৰি নিয়া ছাগলীটো উভটাই দিলেহে ম'বাইলটো ঘুৰাই দিব বুলি স্পষ্ট কৈ জনাই দিছে । চোৰে ছাগলীটো ঘুৰাই ম'বাইলটো আনিব বুলি প্ৰতিশ্ৰুতিও দিছে । কিন্তু বৰ্তমানলৈকে ছাগলী সহ চোৰৰ দেখা দেখি নাই । আনহাতে ছাগলীটো চোৰৰ পৰা ঘুৰাই পোৱাৰ আশাত চোৰৰ বিষয়ে স্থানীয় আৰক্ষীক গোচৰ দিয়া নাই তিলক গগৈ নামৰ লোকজনে । ঘটনাটোৱে অঞ্চলটোত আমোদৰ সৃষ্টি কৰিছে ।
লগতে পঢ়কঃ শনিবাৰৰ পৰা অসমৰ ৬৫ স্থানত আৰম্ভ হ'ব ক'ভিড ভেকচিন প্ৰদান কাৰ্যসূচী
