তিতাবৰ, 9 এপ্ৰিল : অগ্নিনিৰ্বাপক বাহিনীৰ জোৱানক প্ৰহাৰ কৰি তিতাবৰৰ বৰহোলাত গ্ৰেপ্তাৰ হল গাওঁ পঞ্চায়তৰ সভাপতি ৷ শুক্ৰবাৰে যোৰহাট জিলাৰ বৰহোলা আৰক্ষীয়ে গ্ৰেপ্তাৰ কৰিছে ৰজাবাহাৰ গাঁও পঞ্চায়তৰ সভাপতি ৰাজেন শইকীয়াক ৷ ঘটনাৰ বিবৰণ অনুসৰি, ৭ এপ্ৰিল অৰ্থাৎ বুধবাৰে ৰজাবাহাৰ গাঁৱৰ প্ৰনৱ চিৰিং ফুকনৰ বাসগৃহত হোৱা শ্বট চাৰ্কিটৰ ফলত এখন গেলামালৰ দোকানত জুইৰ সূত্ৰপাত হৈছিল ।
জুই নিৰ্বাপন কৰিবলৈ সেই ঠাইত উপস্থিত হোৱা অগ্নিনিৰ্বাহক বাহিনীৰ বাহনৰ পানী শেষ হোৱাক কেন্দ্ৰ কৰি এজন জোৱানক ৰাজেন শইকীয়াই আক্ৰমণৰ লক্ষ্য কৰি লয় । ৰাজেন শইকীয়াই অগ্নি নিৰ্বাপক বাহিনীৰ জোৱান কৌস্তৱ ফুকনক ঘটনাস্থলীতে শাৰীৰিক ভাৱে অপদষ্ট কৰে । এই ঘটনাক লৈ বৰহোলা আৰক্ষী থানাত অগ্নি নিৰ্বাপক বাহিনীৰ জোৱান কৌস্তৱ ফুকেন এটা গোচৰ ৰুজু কৰিছে ৷ সেই গোচৰৰ ভিত্তিতে ৰাজেন শইকীয়াক শুক্ৰবাৰে আৰক্ষীয়ে গ্ৰেপ্তাৰ কৰি জেল হাজোতলৈ প্ৰেৰণ কৰিছে ৷
লগতে পঢ়ক : চিবিএচই পৰীক্ষা বাতিলৰ দাবী প্ৰিয়ংকা গান্ধীৰ
