যোৰহাট, 9 নৱেম্বৰ: 'সুধাকণ্ঠ ডঃ ভূপেন হাজৰিকা আছিল গণশিল্পী ৷ তেওঁ গাইছিল মানুহৰ গান ৷ তেখেতৰ গীতত আছিল সৃষ্টিশীলতা ৷ তেখেতৰ গীতত আছিল গ্ৰহণযোগ্যতা ৷' এই মন্তব্য, সুধাকণ্ঠৰ পুত্ৰ তেজ হাজৰিকাৰ ৷
আজি যোৰহাটৰ ক্ৰিচেণ্ট একাডেমীত অনুষ্ঠিত এক বিশেষ সম্বৰ্ধনা অনুষ্ঠানত সুধাকণ্ঠৰ পুত্ৰ তেজ হাজৰিকাই "সুধাকণ্ঠ ডঃ ভূপেন হাজৰিকাৰ কবিতা আৰু ইয়াৰ সত্যাসত্য" শীৰ্ষক বক্তৃতাত মন্তব্য প্ৰদান কৰাৰ লগতে কয় যে, মানুহ তথা সমাজৰ প্ৰতিও দায়বদ্ধতা আছে সুধাকণ্ঠৰ ৷ তেওঁ মানুহৰ মূল্য বুজি পাইছিল ৷ তেওঁৰ এই প্ৰমূল্যবোধৰ বাবেই ভাৰত চৰকাৰে 'ভাৰতৰত্ন' উপাধি প্ৰদান কৰিছে ৷ যি উপাধি দেশ বা ৰাজ্যবাসীৰ বাবে গৌৰৱৰ বিষয় ৷ ইয়াৰ উপৰিও যোৰহাট জিলাতেই ডঃ ভূপেন হাজৰিকাক সুধাকণ্ঠৰ দৰে উপাধি প্ৰদান কৰা হৈছিল ৷ 'সুধাকণ্ঠ' হৈছে এগৰাকী ব্যক্তিৰ বাবে গুৰুত্বপূৰ্ণ উপহাৰ ৷ যি উপাধি ডঃ ভূপেন হাজৰিকাক প্ৰদানৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰিছিল বিভূচৰণ বৰুৱা আৰু দিননাথ চৌধুৰীয়ে ৷ ডঃ হাজৰিকা আছিল 'এ মেন ৱিথ এ ভিজন ৷' মানুহে তেখেতৰ গীত বা কবিতাৰ সাৰমৰ্ম অনুধাৱন কৰিব পাৰিছিল ৷
অনুষ্ঠানত উপস্থিত থাকে তেজ হাজৰিকাৰ পুত্ৰ তেজ আকাশ হাজৰিকাও ৷ সুধাকণ্ঠৰ নাতিৰ মন্তব্য: 'মোৰ ককাৰ প্ৰতি অসমবাসী ৰাইজৰ মৰম শ্ৰদ্ধা দেখি আপ্লুত হৈ পৰিছো । অসমলৈ আহি বহু আনন্দ লাভ কৰিছো ৷ অসমবাসীৰ মৰম দেখি আপ্লুত হৈ পৰিছো ৷ মোৰ নাম সুধাকণ্ঠ ৰ লগত সংযোগ হোৱাত মই যথেষ্ট আবেগিক আৰু সুখী ৷'
আজিৰ অনুষ্ঠান ত উপস্থিত থাকি তেজ আকাশ হাজৰিকাই উপস্থিত ছাত্ৰ-ছাত্ৰী সকলক উদ্দেশ্যি কয়, 'ভ্ৰমণে মানুহৰ মানসিক শক্তি বৃদ্ধি কৰে | ই বহু কথা জনাত সহায় কৰে, সেইবাবে সকলোৱে ভ্ৰমণ বিলাসী হোৱা উচিত | অসমলৈ আহি মই অসমৰ সৌন্দৰ্য নিজ চকুৰে উপলব্ধি কৰিছো |'
অনুষ্ঠানত সুধাকণ্ঠৰ পুত্ৰ তেজ হাজৰিকাক যোৰহাটৰ প্ৰায় ২০টাৰো অধিক অনুষ্ঠান-প্ৰতিষ্ঠানে সম্বৰ্ধনা জ্ঞাপন কৰে ।
