যোৰহাট, 27 ফেব্ৰুৱাৰী : অসম আৰক্ষীৰ খাকী পোচাকত আকৌ লাগিছে দাগ ( Dergaon police rape case)৷ এইবাৰ আৰক্ষীৰ বৰঘৰ সদৃশ দেৰগাঁৱৰ আৰক্ষীৰ প্ৰশিক্ষণ থলীত সংঘটিত হৈছে এক অঘটন ৷ অভিযোগ অনুসৰি, দেৰগাঁৱৰ আৰক্ষীৰ প্ৰশিক্ষণথলীতে এজন পুৰুষ আৰক্ষী জোৱানৰ নিৰ্যাতনৰ বলি হ’ল এগৰাকী মহিলা আৰক্ষী জোৱান (Cop detained for raping woman constable at Dergaon)৷
ঘটনাৰ বিৱৰণী অনুসৰি, চলিত মাহৰ 22 তাৰিখে আৰক্ষী প্ৰশিক্ষণথলীত এগৰাকী মহিলা প্ৰশিক্ষণৰত আৰক্ষী অসুস্থ হৈ পৰে ৷ তেতিয়া তেওঁৰ এগৰাকী সহযোগী মহিলা প্ৰশিক্ষণৰত আৰক্ষীয়ে জ্যেষ্ঠ আৰক্ষীৰ কথা মতে লৈ যায় প্ৰশিক্ষণথলীৰ ভিতৰৰে কেন্দ্ৰীয় চিকিৎসালয়লৈ ৷
উক্ত দিনা নিশাৰ ভাগত অসুস্থ মহিলা আৰক্ষীগৰাকীক গৰম পানীৰ প্ৰয়োজন হোৱাত সহযোগী মহিলা জোৱানগৰাকীয়ে কাষৰ এটা কোঠাত গৰম পানীৰ ব্যৱস্থা কৰে ৷ সেই সময়ত কেন্দ্ৰীয় চিকিৎসালয়খনত কোনো নথকাৰ সুযোগ লয় নিশা নিৰাপত্তাৰ দায়িত্বত থকা নৱম অসম আৰক্ষী বাহিনীৰ কনিষ্টবল বাবুল ভূঞাই ৷
গৰম পানী কৰিবলৈ অহা কোঠাটোৰ দুৱাৰ বন্ধ কৰি অভিযুক্ত কনিষ্টবল বাবুল ভূঞাই শ্লীলতা হানিৰ চেষ্টা কৰে মহিলা আৰক্ষী জোৱানগৰাকীক ৷ তাৰ পাচতেই উক্ত স্থানৰ পৰা পলায়ন কৰে অভিযুক্ত বাবুল ভূঞাই । পৰৱৰ্তী সময়ত ভুক্তভোগী মহিলা আৰক্ষীগৰাকীয়ে বিভাগীয় বিষয়াক সমগ্ৰ ঘটনা সন্দৰ্ভত অৱগত কৰায় ৷ কিন্তু দায়িত্বত থকা বিভাগীয় বিষয়াসকলে কোনো গুৰুত্ব প্ৰদান কৰাৰ অভিযোগ উত্থাপন কৰে ভুক্তভোগী মহিলাগৰাকীয়ে ৷
তেনেকৈয়ে উক্ত ঘটনাৰ দুই-চাৰিদিন পাৰ হয় ৷ আন দিনাৰ দৰে দেওবাৰ অৰ্থাৎ 26 ফেব্ৰুৱাৰীৰ বিয়লিভাগত প্ৰশিক্ষণৰত আৰক্ষীৰ দৈনিক গণনা চলি আছিল ৷ তেনে সময়ত হঠাৎ অসুস্থ হৈ মাটিত ঢলি পৰে ভুক্তভোগী মহিলা আৰক্ষী জোৱানগৰাকী ৷ তাৰ পাচতে সকলোৱে উক্ত ঘটনা সন্দৰ্ভত জ্ঞাত হয় ৷ লগে লগে আৰক্ষী বিভাগৰ উচ্চপদস্থ বিষয়াসকল সমগ্ৰ ঘটনা সম্পৰ্কত অৱগত কৰায় । আনকি দেওবাৰে নিশাই দেৰগাঁও আৰক্ষীয়ে আটক কৰে অভিযোগৰ আঙুলি উঠা বাবুল ভূঞা নামৰ আৰক্ষীজনক ।
জানিব পৰা মতে, সোমবাৰে বাবুল ভূঞাক হাজিৰ কৰোৱা হয় আদালতত । মন কৰিবলগীয়া যে, এই ঘটনা সাংবাদিকৰ দৃষ্টিগোচৰ হয় বুলি যথেষ্ট গোপনীয়তা অৱলম্বন কৰিছে আৰক্ষীয়ে । ঘটনা সন্দৰ্ভত কোনো মন্তব্য দিয়াৰ পৰা বিৰত আছে দেৰগাঁও আৰক্ষী ৷ ইতিমধ্যেই ভুক্তভোগী মহিলা আৰক্ষীগৰাকীয়ে দিয়া এজাহাৰৰ ভিত্তিত দেৰগাঁও আৰক্ষীয়ে 43/2023, 376/ 201/ 506 IPC ধাৰাত এক গোচৰ ৰুজু কৰি তদন্ত আৰম্ভ কৰিছে বুলি জানিব পৰা গৈছে ।
লগতে পঢ়ক : Dima Hasao Rape case: 4 বছৰৰ অন্তত ধৰ্ষণকাৰীক 15 বছৰ সশ্ৰম কাৰাদণ্ড
