যোৰহাট, ২৬ মে': ৰাজ্যত ক'ভিডৰ দ্ৰুত সংক্ৰমণ । ইয়াৰ মাজতে একাংশ স্থানত এতিয়াও ক'ভিড বিধি উলংঘন হৈ আছে । যোৰাহাট জিলাত এখন বজাৰকলৈ শেহতীয়াকৈ সামাজিক মাধ্যমত চৰ্চা চলিছিল । জিলাখনৰ নিউভিল ৰোডত প্ৰতিদিনে এখন ডাঙৰ বজাৰ বহে । চৰকাৰে বজাৰ বন্ধৰ নিৰ্দেশনা দিয়াৰ পিছতো এই বজাৰ খন চলি আছিল । আনকি শাক-পাচলি, মাছ-মাংস আদিৰ বজাৰখনত নিতৌ যথেষ্ট লোকে ভিৰ কৰি আছিল ।
কেৱল এয়াই নহয় কোনো সামাজিক দূৰত্ব পালন নকৰি খুচুৰা ব্যৱসায়ীসকলে ব্যৱসায় চলাইছিল । গ্ৰাহকসকলেও উলংঘন কৰিছিল ক'ভিড বিধি । এই খবৰ সামাজিক মাধ্যমত প্ৰচাৰ হোৱাৰ পিছতে সৰৱ যোৰহাট জিলা প্ৰশাসন । উপায়ুক্ত আৰু আৰক্ষী অধীক্ষকে বিষয়টো গুৰুত্ব সহকাৰে লৈ অৱশেষত ৭ দিনৰ বাবে বন্ধ কৰিলে খুচুৰা বজাৰখন ।
ইফালে এই নিৰ্দেশনাৰ পিছতে বজাৰখন সম্পূৰ্ণ বন্ধ হৈছে যদিও ব্যৱসায়ীসকলে ক্ষোভ প্ৰকাশ কৰিছে । তেওঁলোকে মজুত কৰি থোৱা শাক-পাচলিসমূহ নষ্ট হোৱাৰ আশংকা প্ৰকাশ কৰাৰ লগতে অনাগত দিনত পাচলিৰ নাটনি হোৱাৰ আশংকা কৰিছে ।
লগতে পঢ়ক:পঞ্চায়তৰ সভানেত্ৰীৰ বিৰুদ্ধে অনাস্থা প্ৰস্তাৱ ৱাৰ্ড সদস্যৰ
