যোৰহাট,3 জুন: ৰাজ্যত এতিয়া পোহৰলৈ আহিছে এজনৰ পাচত আন এজন চিকিৎসকক প্ৰহাৰ কৰা ঘটনা ৷ হোজাই ফুলতলি কাণ্ডৰ উত্তেজনা মাৰ নৌ যাওঁতেই পুনৰ অনুৰূপ ঘটনা সংঘটিত হৈছে মৰিয়নীত । কথমপি প্ৰাণৰক্ষা পৰে এজন চিকিৎসকৰ । বাগিছাৰ একাংশ শ্ৰমিক আৰু গাঁওৰক্ষী বাহিনীৰ তৎপৰতা কথমপি প্ৰাণৰক্ষা কাকজান চাহ বাগিছাৰ চিকিৎসক ।
জানিব পৰা মতে, বাগিছাখনৰ শ্ৰমিক ৰাজু ৰবি দাস কিছুদিনৰ পৰা শাৰীৰিক অসুস্থতাত ভুগি আছিল । বুধবাৰে নিশা শৰীৰৰ অৱনতি ঘটাত ৰাজু ৰবি দাসক বাগিছাৰ চিকিৎসালয়লৈ পৰিয়ালৰ লোকে লৈ আনে । বাগিছাৰ চিকিৎসকে ৰাজু ৰবি দাসক উন্নত চিকিৎসাৰ বাবে যোৰহাট চিকিৎসা মহাবিদ্যালয়লৈ প্ৰেৰণ কৰে যদিও আদবাটতে ৰাজু ৰবি দাসৰ মৃত্যু ঘটে ।
মৃত ৰাজু ৰবি দাসৰ পৰিয়ালৰ লোকে পুনৰ মৃতদেহ লৈ কাকজান চাহ বাগিছাৰ চিকিৎসালয়লৈ আহি এক উত্তপ্ত পৰিস্থিতিৰ সৃষ্টি কৰে । অৱশ্যে বাগিছা খনৰ একাংশ শ্ৰমিক আৰু গাঁওৰক্ষী বাহিনীৰ তৎপৰতাত কথমপি প্ৰাণৰক্ষা পৰে চিকিৎসক গৰাকীৰ । আনহাতে মৃত ৰাজু ৰবি দাসৰ পৰিয়ালৰ লোকে বাগিছা চিকিৎসালয়ত দুৱাৰ খিৰিকীৰো অনিষ্ট সাধন কৰে ।
ঘটনাৰ পাছতে তিতাবৰ মহকুমা আৰক্ষী বিষয়া, মৰিয়নী আৰু দেৱেৰাপাৰ আৰক্ষী চকীৰ ভাৰপ্ৰাপ্ত আৰক্ষী বিষয়াৰ নেতৃত্বত আৰক্ষীৰ এটা দল ঘটনাস্থলী উপস্থিত হয় ৷ আৰক্ষী উপস্থিত হোৱাতহে পৰিস্থিতি কিছু সাম কাটে ৷
লগতে পঢ়ক: চিকিৎসাকৰ্মীক পুনৰ প্ৰহাৰ: আটক চাৰিজন
