হোজাই, 24 মেঃ হোজাইত বন্যহস্তীৰ তাণ্ডৱ ৷ শনিবাৰে নিশা হোজাইৰ বিষ্ণুপুৰ, চন্দনপুৰ, কছাৰীগাঁও আদি অঞ্চলত উপদ্ৰৱ চলাই বন্যহস্তীয়ে । বন্যহস্তীৰ জাকে বিষ্ণুপুৰ গাঁৱত প্ৰৱেশ কৰি তিনিটাকৈ বাসগৃহ তথা ভড়াল গৃহৰ ক্ষতিসাধন কৰাৰ লগতে এখন গেলামালৰ দোকানৰো বিস্তৰ ক্ষতি কৰে । দোকান ঘৰৰ দুয়ো ফালৰ বেৰ ভাঙি প্ৰায় ১৭-১৮ হেজাৰ টকাৰ সামগ্ৰী লণ্ডভণ্ড কৰে বন্যহস্তীৰ জাকটোৱে ।
আনহাতে, নিশাই ঘটনা সন্দৰ্ভত বন বিভাগৰ আলি উপাধিৰ এগৰাকী বিষয়াক স্থানীয় ৰাইজে অৱগত কৰিছিল যদিও তেখেত ছুটীত থকা বুলি কৈ গৃহস্থক ঘৰটোৰ ফটো তুলি ৰাখিবলৈ কয় । বন বিভাগৰ কোনো লোক ঘটনাস্থলীত উপস্থিত নোহোৱাত ক্ষোভিত হৈ পৰে অঞ্চলবাসী । উল্লেখ্য যে, হোজাইৰ দাঁতিকাষৰীয়া অঞ্চলত প্ৰতিনিশা বন্যহস্তীয়ে চলাই আহিছে ধ্বংসলীলা । যাৰবাবে এতিয়া বিনিদ্ৰ ৰজনী কটাইছে অঞ্চলবাসীয়ে ।
লগতে পঢ়ক- ৰঙাপৰাত প্ৰথমটো বানে বুৰালে শ শ হেক্ট'ৰ কৃষি ভূমি : চিন্তিত কৃষক ৰাইজ
