হোজাই, ২৭ অক্টোবৰ : গুৱাহাটীৰ পৰা অহা এটি STF ৰ দলে বুধবাৰে হোজাই জিলাৰ লংকা আৰক্ষীৰ সহযোগত বৃহৎ পৰিমাণৰ হেৰ'ইনসহ এজন লোকক আটক কৰে । জব্দকৃত হেৰ’ইনখিনিৰ বজাৰ মূল্য প্ৰায় ১০ লাখ হ’ব বুলি STF লোকে জানিবলৈ দিয়ে । লংকাৰ ৫৪ নং ৰাষ্ট্ৰীয় ঘাইপথৰ কাষৰ এখন নাৰ্চাৰীৰ সম্মুখৰ পৰা অভিযানকাৰী দলটোৱে হেৰ'ইনসহ লোকজনক আটক কৰে ।
আনহাতে, আটকাধীন লোকজন উদালীৰ কছাৰী গাঁৱৰ মজিবুৰ ৰহমান বুলি জানিব পৰা গৈছে । মজিবুৰ ৰহমানে AS 02 U 2363 নম্বৰ এখন স্কুটীত ১৬ টা চাবোনৰ কন্টেইনাৰত ২৮১ গ্ৰাম হেৰ'ইন ডিমাপুৰৰ পৰা লংকালৈ লৈ আনিছিল । STF বাহিনী আৰু লংকা আৰক্ষীয়ে গোপন সূত্ৰৰ ভিত্তিত তালাচী চলাই হেৰ’ইনখিনি জব্দ কৰে ।
অভিযানৰ সময়ত মজিবুৰৰ লগত থকা আন তিনিজন হেৰ’ইন সৰবৰাহকাৰী পলায়ন কৰিবলৈ সক্ষম হয় । আটকাধীন মজিবুৰ ৰহমানৰ লগতে স্কুটীখন আৰু জব্দকৃত হেৰ’ইনখিনি লংকা আৰক্ষীয়ে থানালৈ লৈ আহে ৷ সম্প্ৰতি ঘটনা সন্দৰ্ভত তদন্ত অব্যাহত ৰাখিছে আৰক্ষীয়ে ।
লগতে পঢ়ক : ফৰেনছিক ৰিপ’ৰ্টত পোৱা গৈছে আকাশ চৌধুৰীৰ ফিংগাৰ প্ৰিণ্ট : মহানগৰ আৰক্ষী আয়ুক্ত
