হোজাই, 19 জুন : হোজাইৰ উত্তৰ ডিমৰুপাৰত সংঘটিত হৈছে এক লাভ জেহাদৰ ঘটনা ৷ এগৰাকী হিন্দু যুৱতীক এজন মুছলিম প্ৰেমিকে পলুৱাই নিয়া ঘটনাক কেন্দ্ৰ কৰি উত্তেজিত আৰ এচ এচ আৰু বজৰং সদস্যই লণ্ডভণ্ড কৰিলে প্ৰেমিকৰ বাসগৃহ ৷ প্ৰেমিক মতিউৰ ৰহমানৰ ঘৰত ইটা, শিলগুটিৰে আক্ৰমণ কৰাৰ লগতে বাসগৃহ লণ্ডভণ্ড কৰে ৷
উল্লেখ্য যে, ডিমৰুপাৰৰ ফজল হকৰ পুত্ৰ মতিউৰ ৰহমানৰ লগত স্থানীয় এগৰাকী যুৱতীৰ দীৰ্ঘদিনীয়া প্ৰেমৰ সম্পৰ্ক আছিল ৷ কেইদিনমান পূৰ্বে যুৱতীগৰাকীয়ে মতিউৰৰ সৈতে গোপনে বিবাহত বহাৰ লগতে অন্তঃসত্তা বুলি দাবী কৰি সমস্ত ভিডিঅ' চ'ছিয়েল মিডিয়াত ভাইৰেল কৰিছিল ৷ লগতে যুৱতী গৰাকীৰ পৰিয়ালৰ লোকে কোনো লোকৰ লগত বলপূৰ্বক বিবাহৰ চেষ্টা কৰা বাবে মতিউৰৰ সৈতে পলাই যোৱা বুলি চ'ছিয়েল মিডিয়াত স্বীকাৰ কৰিছিল ৷ এইয়া লাভ জেহাদৰ পৰিণতি বুলি মন্তব্য কৰি আৰ এচ এচ আৰু বজৰং দলে প্ৰেমিকৰ ঘৰত এনেদৰে আক্ৰমণ চলায় ৷ এই আক্ৰমণৰ পাছতে মতিউৰৰ পৰিয়ালৰ লোকে হোজাই থানাত এখন এজাহাৰ দাখিল কৰিছে ৷ ইফালে যুৱতী গৰাকীৰ পৰিয়ালৰ লোকে যুৱতীগৰাকীক অতি শীঘ্ৰে উদ্ধাৰ কৰিবলৈ প্ৰশাসনক দাবী জনাইছে ৷
