হোজাই, 18 ফেব্ৰুৱাৰী : চোৰাং কাঠৰ সৰবৰাহ আৰু ইয়াৰ অবৈধ ব্যৱসায়ৰ বিৰুদ্ধে ৰাজ্যত অব্যাহত আছে বন বিভাগৰ অভিযান ৷ দুৰ্নীতি তথা অনিয়মেৰে চলাই যোৱা কাঠফলা মিল, চোৰাং সৰবৰাহ আদিৰ বিৰুদ্ধে সস্তম হোজাইৰ বন বিভাগো ৷ কাঠৰ এই চোৰাং ব্যৱসায়ৰ বিৰুদ্ধে অভিযান চলাই হোজাইৰ বন বিভাগে কঠোৰ স্থিতি গ্ৰহণ পূৰ্বেও বহু কাঠফলা মিল জব্দ কৰাৰ লগতে আটক কৰিছে অপৰাধীক ৷
বৃহস্পতিবাৰে হোজাই জিলাৰ মোৰাঝাৰত বন বিভাগে অভিযান চলাই জব্দ কৰিলে চোৰাং ভাৱে সৰবৰাহ কৰা কেইবা লাখ টকাৰ চেগুন গছৰ কুণ্ডাসহ এটা কাঠফলা মিল (Huge amount of wood seized) ৷ হোজাই বন বিভাগ আৰু মোৰাঝাৰ আৰক্ষীৰ যৌথ অভিযানত জব্দ কৰিবলৈ সক্ষম হয় চোৰাং ভাৱে সৰবৰাহ কৰা বৃহৎ পৰিমাণৰ চেগুন গছৰ কুণ্ডাখিনি ৷
এক গোপন সূত্ৰৰ পম খেদি, বৃহস্পতিবাৰে নিশা হোজাইৰ বন সুৰক্ষা বিষয়া মহেশ নাথ আৰু মোৰাঝাৰ থানাৰ আৰক্ষী বিষয়া মিন্টু সন্দিকৈৰ নেতৃত্বত চলাইছিল এই অভিযান ৷ হোজাই বন বিভাগৰ লোকে সদৰি কৰা অনুসৰি, অতি পৰিত্যক্ত স্থানত লুকুৱাই ৰখা হৈছিল জব্দকৃত চেগুন গছৰ কুণ্ডাখিনি ৷
বন সুৰক্ষা বিষয়া মহেশ নাথে উল্লেখ কৰা অনুসৰি, জব্দকৃত চেগুন গছৰ কুণ্ডাখিনিৰ বজাৰ মূল্য হ’ব প্ৰায় ১০ লাখ টকা ৷ চোৰাং ব্যৱসায়ীয়ে কাৰ্বি পাহাৰৰ পৰা চেগুন গছ কাটি অনাৰ সন্দেহ কৰিছে বিন বিভাগে ৷ অৱশ্যে এই অভিযানত কোনো লোকক অভিযানকাৰী দলটোৱে আটক কৰিবলৈ সক্ষম হোৱা নাই যদিও মোৰাঝাৰ থানাত ৰুজু কৰা হৈছে এটি গোচৰ ৷
লগতে পঢ়ক : জামুগুৰিত ৰে’লৱে ষ্টেচনৰ সমীপৰ পথাৰত যুৱতীৰ মৃতদেহ উদ্ধাৰ
