হোজাই, 1 অক্টোবৰ : হোজাই জিলাত যান-বাহন চালক সকললৈ প্ৰশাসনৰ তৰফৰ পৰা নতুন নিৰ্দেশনা ৷ ইন্ধন ক্ৰয় কৰাৰ সময়ত চালকসকলে দেখুৱাব লাগিব এপালি হ’লেও ক’ভিড প্ৰতিশেষধক গ্ৰহণ কৰাৰ প্ৰমাণপত্ৰ ৷ বৃহস্পতিবাৰে হোজাই জিলা উপায়ুক্ত অনুপম চৌধুৰীৰ অধ্যক্ষতাত অনুষ্ঠিত হোজাই জিলা পথ সুৰক্ষা কমিটীৰ এখন সভাত এই সিদ্ধান্ত গ্ৰহণ কৰা হয় ৷
এই সভাতেই উপায়ুক্ত গৰাকীয়ে দুৰ্ঘটনা নিয়ন্ত্ৰণৰ ক্ষেত্ৰত জিলা পৰিবহণ বিভাগৰ লগতে আৰক্ষীক যৌথভাৱে জিলাখনত তালাচী অব্যাহত ৰাখিবলৈ নিৰ্দেশ প্ৰদান কৰে ৷ সভাত উপায়ুক্ত গৰাকীয়ে উল্লেখ কৰে যে, হেলমেট আৰু মাস্ক পৰিধান নকৰা দুচকীয়া বাহনৰ চালকসকলে ইন্ধন ক্ৰয় কৰিব নোৱাৰিব ৷
তাৰোপৰি সকলো ধৰণৰ যান-বাহনৰ চালকেই ইন্ধন ক্ৰয় কৰা সময়ত কমেও এপালি হ’লেও ক'ভিড প্ৰতিষেধক গ্ৰহণ কৰাৰ প্ৰমাণ পত্ৰ দেখুৱাব লাগিব ৷ এই সভাখনত উপস্থিত আছিল অতিৰিক্ত উপায়ুক্ত গকুল চন্দ্ৰ ব্ৰহ্ম, জিলা পৰিবহণ বিষয়া তামচিন আফটাব, উপ-আৰক্ষী অধীক্ষক ৰ’জী তালুকদাৰ প্ৰমুখ্যে সংশ্লিষ্ট বিভাগৰ বিষয়া আৰু কৰ্মচাৰীসকল ৷
লগতে পঢ়ক : শ্বেৰমান আলী ভাৰতীয় হয় নে নহয় সন্দেহ আছে বিজেপি মুখপাত্ৰ ৰঞ্জীৱ কুমাৰ শৰ্মাৰ
