হোজাই, 22 জুলাইঃ হোজাই মোৰাঝাৰ ষ্টেট বেংকত এশ কোটি টকাৰ কৃষি ঋণ কেলেংকাৰী৷ বেংকৰ দুজন শাখা প্ৰৱন্ধকৰ সহযোগত এটা দালাল চক্ৰই ভুৱা নথি পত্ৰৰে এশ কোটি টকাৰ কৃষি ঋণ মোকলাই নিয়াৰ অভিযোগ ৷ এই কৃষি ঋণ কেলেংকাৰীৰ অন্যতম অভিযুক্ত হ'ল বেংকৰ প্ৰাক্তন শাখা প্ৰৱন্ধক দেৱজিৎ তালুকদাৰ৷ এটা বৃহৎ চক্ৰৰ সৈতে মিলি বেংকৰ প্ৰাক্তন শাখা প্ৰৱন্ধকজনে অজ্ঞাত লোকৰ নামত খুলিছিল বহু কেইটা বেংক একাউন্ট ৷
সেই একাউন্টবোৰৰ বিপৰীতে কৃষি ঋণ মুকলি কৰি প্ৰায় এশ কোটি টকা আত্মসাৎ কৰাৰ অভিযোগ ৷ কেৱল ইমানেই নহয় একাংশ মৃত লোকৰ নামতো বেংক একাউন্ট খুলি মোকলাই নিছিল কৃষি ঋণৰ ধন৷ এই কেলেংকাৰীত দুই প্ৰাক্তন শাখা প্ৰৱন্ধক ক্ৰমে দেৱজিৎ তালুকদাৰ আৰু সমীৰ দে সহ আন ১৬ জন লোক জড়িত থকাৰ তথ্য লাভ কৰিছে আৰক্ষীয়ে৷ উক্ত বিয়াগোম কেলেংকাৰী বিৰুদ্ধে মোৰাঝাৰ থানাত মুঠ 7 টাকৈ গোচৰ ৰুজু হৈছে৷ উক্ত গোচৰত অভিযুক্ত কৰা হৈছে মুঠ ১৮ জন লোকক ৷ আৰক্ষীয়ে এই কেলেংকাৰীত জড়িত থকাৰ অভিযোগত পূৰ্বতে আন দুজন লোকক গ্ৰেপ্তাৰ কৰি জেললৈ প্ৰেৰণ কৰিছিল৷ এক গোপন সুত্ৰৰ পম খেদি মোৰাঝাৰ আৰক্ষীয়ে নগাঁৱৰ পৰা দেৱজিৎ তালুকদাৰক গ্ৰেপ্তাৰ কৰে৷ বাকী অভিযুক্ত বৰ্তমান পলাই থকা বুলি জানিব পৰা গৈছে৷ সম্প্ৰতি দেৱজিৎ তালুকদাৰক মোৰাঝাৰ থানাত চলাই থকা হৈছে মাৰাথন জেৰা৷ অচিৰেই আন বহুকেইজন লোক আৰক্ষীৰ জালত পৰাৰ সম্ভাৱনা আছে৷
আৰু পঢ়কঃসাৱধান! পৃথিৱীৰ ভিতৰতে ক'লা কাৰ্বনৰ প্ৰদূষণস্থলী গুৱাহাটী
