হোজাই,18 জানুৱাৰী: হোজাইৰ এজন লোকে বায়ু প্ৰদূষণ ৰোধ কৰাৰ লক্ষ্যৰে হাতত লৈছে ব্যতিক্ৰমী পদক্ষেপ ৷ ধনীৰাম পথাৰ গাঁৱৰ প্ৰদীপ দেৱনাথ নামৰ লোকজনে নিজৰ চাদত আৰম্ভ কৰিছে বিভিন্ন ধৰণৰ পাচলি আৰু ফুলৰ খেতি ৷ নিজৰ ঘৰৰ দ্বিতীয় মহলাৰ প্ৰায় ৮ হাজাৰ বৰ্গ ফুটৰ চাদত তিনি লাখ টকা ব্যয়ৰে আৰম্ভ কৰা খেতিয়ে দৃষ্টি আকৰ্ষণ কৰিছে স্থানীয় ৰাইজৰ ৷ লকডাউনৰ সময়ত আৰম্ভ কৰা এই খেতিয়ে ইতিমধ্যে ফল ধৰা আৰম্ভ কৰাত আকৰ্ষণীয় হৈ পৰা দৃশ্য আৰু পদ্ধতিবোৰ চাবলৈ নিতৌ সমাগম ঘটে বহু লোকৰ ৷
উল্লেখ্য যে,প্ৰদীপ দেৱনাথৰ চাদত ২৪ বিধ প্ৰজাতিৰ ফুল গছ,৩০ বিধ প্ৰজাতিৰ পাচলি আৰু ২৭ বিধ প্ৰজাতিৰ ফল মূলৰ গছ আছে ৷ ষ্ট্ৰবেৰী,ইলাচি,ছবেদা, ড্ৰেগণ,মৌচুমী,কমলা,পানী লাও,কুঁহিয়াৰ,নাৰিকল,বগৰী আৰু অন্যান্য বিভিন্ন প্ৰজাতিৰ ঔষধি গছ ৰোপণ কৰিছে প্ৰদীপ দেৱনাথে ৷ চাদৰ ওপৰত কৰা খেতি আৰু বাগিচাখন চোৱাচিতা আৰু পৰিষ্কাৰ পৰিচন্নকৈ ৰখাৰ বাবে স্থায়ীভাৱে নিয়োগ কৰিছে এজন শ্ৰমিকো।
লগতে পঢ়ক: আজি ধেমাজিত চাইকেল ৰেলীত অংশ ল'লে মন্ত্ৰী হিমন্তই
