হোজাই, 6 অক্টোবৰঃ সমগ্ৰ ৰাজ্যৰ লগতে হোজাইতো উলহ মালহে পালন কৰা হৈছে শাৰদীয় দূৰ্গা পূজা | হোজাইৰ দূৰ্গা পূজাৰ ভিতৰত ৰাইজৰ আকৰ্ষণৰ কেন্দ্ৰ বিন্দু হৈ পৰিছে ডাইন'ছৰাছ আৰ্হিৰে নিৰ্মিত গান্ধী মৈদানৰ পূজা মণ্ডপ | বিগত ১৩ বছৰে উক্ত পূজা সমিতিয়ে ভক্ত প্ৰাণ ৰাইজৰ মন আকৰ্ষণ কৰাৰ নিৰ্মিতে ন ন ৰূপেৰে সাজি উলিয়াই আহিছে মণ্ডপ | এইবাৰো ব্যতিক্ৰম ৰূপত এই পূজা মণ্ডপ | এইবাৰো স্থানীয় শিল্পীৰ দ্বাৰা ডেৰ মাহৰ অন্তত: নিৰ্মাণ কৰি উলিয়াইছে বিশ্বৰ পৰা বিলুপ্ত হৈ যোৱা ডাইন'চৰাছৰ আৰ্হিৰে পূজা মণ্ডপ | এই মণ্ডপ ভাগত মহাঅষ্টমীৰ দিনটোত ভক্তপ্ৰাণ ৰাইজে মাৰ আৰ্শীষ লোৱাৰ লগতে পূজা মণ্ডপ ভাগ চাৱলৈ ভক্তপ্ৰাণ ৰাইজৰ লানি নিচিগা সোঁত বোৱা পৰিলক্ষিত হৈছে | লগতে এই মণ্ডপৰ চৌহদত মহিলা পুৰুষ সমানে একেলগে বাদ্য বজাই মা দুৰ্গাক আৰাধনা কৰি বাদ্যৰ তালে তালে নৃত্য কৰা দৃশ্যই ভক্ত প্ৰাণ ৰাইজৰ মন আকৰ্ষণ কৰিছে ৷
ইফালে শাৰদীয় দুৰ্গা পূজাত "খেলনা পিষ্টলৰ সলনি আপোনাৰ সন্তানটিৰ হাতত এখন কিতাপ তুলি দিয়ক" আৰু "প্ৰিয়জনক এখন কিতাপ উপহাৰ দিয়ক" | এই বাৰ্তাৰে সৰুপথাৰত শাৰদীয় গ্ৰন্থ মেলা | সৰুপথাৰ প্ৰান্তোস দাস ফাউণ্ডেচন আৰু অন্যপথ গোষ্ঠীয়ে বিগত বৰ্ষৰ দৰে এইবাৰো সৰুপথাৰ নগৰৰ মাজ মজিয়াত গ্ৰন্থ বিপনীৰে শাৰদীয় গ্ৰন্থমেলাৰ আয়োজন কৰিছে | শাৰদীয় দুৰ্গা পূজাত সৰুপথাৰৰ এই গ্ৰন্থ বিপনীত ছাত্ৰ ছাত্ৰী লগতে অভিভাৱকে সঁহাৰি জনোৱা পৰিলক্ষিত হয় | এইবাৰৰ দুৰ্গা পূজাত ছাত্ৰ ছাত্ৰীয়ে খেলনা ক্ৰয় কৰাৰ সমান্তৰালভাৱে একোখনকৈ গ্ৰন্থ কৰা দেখা গ'ল ৷
ব্যতিক্ৰম দৰঙৰ খাৰুপেটীয়া পূজা মণ্ডপো ৷ মহাঅষ্টমীৰ দিনটোত দিল্লীৰ পৰা অহা দৰং এক্সপ্ৰেছ ৰেলখন ছিপাঝাৰ , মঙলদৈ হৈ উপস্থিত হ'ল খাৰুপেটীয়া ৰেল ষ্টেচনত । খাৰুপেটীয়া ষ্টেচনত ভক্তৰ লানি নিচিগা সোঁত । বাস্তৱত নহলেও এয়া সম্ভব হ'ল শাৰদীয় দুৰ্গোৎসৱত ২৫ বছৰ গৰকা খাৰুপেটীয়া টাইগাৰ ক্লাবৰ পূজা মণ্ডপত । চলন্ত ৰে'ল , ষ্টেডিয়াম, খোৱাপানী আদি খাৰুপেটীয়াৰ বিভিন্ন সমস্যা সমূহক আৰ্হি হিচাপে লৈ " মূল পূজা মণ্ডপত উপস্থাপন কৰি আকৰ্ষিত কৰি তুলিছে আজি পৰ্যন্ত ৰে'ল সেৱাৰ পৰা বঞ্চিত হৈ থকা দৰঙবাসী ৰাইজক ।
