হোজাই,25 জুলাইঃ হোজাই জিলাৰ লংকাত ক'ৰণাৰ গণ সংক্ৰমণৰ আশংকা ৷ শুকুৰবাৰৰ দিনটোতে লংকাত মুঠ 12 গৰাকীৰ শৰীৰত ধৰা পৰিছে কৰ'ণাৰ সংক্ৰমণ ৷ লংকা পিয়লী বজাৰৰ মাজমজিয়াত থকা অংগশ্ৰী বস্ত্ৰালয়ৰ স্বত্বাধিকাৰৰ পৰিয়ালৰ শিশু সহ 9 জনৰ দেহত ধৰা পৰিছে ক'ৰণা ভাইৰাছৰ অৱস্থিতি ৷ ইতিমধ্যে শুকুৰবাৰৰ সন্ধিয়া অংগশ্ৰী বস্ত্ৰালয়ৰ তিনিখনকৈ কাপোৰৰ ব্যৱসায় প্ৰতিষ্ঠান ছিল কৰি দিছে জিলা প্ৰশাসনে ।পৰিয়ালটোৰ ক'ৰণা পজিটিভ অহা 9 জন লোকৰ নাম ক্ৰমে টুহিছা ঘোষ, তুষাৰ ঘোষ, পিণ্টু ঘোষ, স্বৰূপ ঘোষ, ঈশ্বিতা ঘোষ, বাপ্পি ঘোষ, পাপৰি ঘোষ, অদ্ৰিতা ঘোষ আৰু পিংকি ঘোষ ।
উল্লেখ্য যে, অংগশ্ৰী বস্ত্ৰালয়ৰ স্বত্বাধিকাৰীৰ ঘৰ লংকাৰ এন -এৰিয়াত । ইয়াৰোপৰি লংকা ভালুকমাৰীৰ ইউ বি আই বেংকত কৰ্মৰত বিবেক কুমাৰ নামৰ এজন কৰ্মচাৰীৰ লগতে তেখেতৰ পিতৃ জগদীশ প্ৰসাদ আৰু মাতৃ সবিতা দেৱীৰ দেহত ধৰা পৰিছে ক'ৰণা ভাইৰাছ ৷
