হোজাই, 12 এপ্ৰিল : অসম ৰাজ্যিক গ্ৰামীণ জীৱিকা অভিযানৰ উদ্যোগত লংকাৰ কাকীৰ নেহৰু খেলপথাৰত 11, 12 আৰু 13 এপ্ৰিলত তিনিদিনীয়া কাৰ্যসূচীৰে অনুষ্ঠিত কৰা হৈছে অসমী ব’হাগী মেলা (Asomi Bohagi Mela in Hojai) । পাহাৰী ঠাইচু মণ্ডল পৰ্যায়ৰ সংগঠন, লামডিং উন্নয়ন খণ্ড পাটকাই মণ্ডল পৰ্যায়ৰ সংগঠন আৰু উদালী উন্নয়ন সংগঠনৰ দ্বাৰা তিনিদিনীয়া কাৰ্যসূচীৰে অনুষ্ঠিত কৰা হৈছে এই ব’হাগী মেলা ৷
সোমবাৰে প্ৰথম দিনাৰ কাৰ্যসূচীত উপস্থিত থাকে লামডিং সমষ্টিৰ বিধায়ক শিবু মিশ্ৰ ৷ লামডিং সমষ্টিৰ বিধায়ক গৰাকীয়ে সোমবাৰে পুৱা অসমী ব’হাগী মেলাৰ শুভ উদ্বোধন কৰে ৷ জানিব পৰা মতে, হোজাই জিলাৰ পাঁচটা উন্নয়ন ব্লকৰ অন্তৰ্গত আত্মসহায়ক গোটৰ 30 খন বিপণীয়ে অংশগ্ৰহণ কৰিছে এই মেলাত ।
বিহুৰ প্ৰাকক্ষণত জিলাখনৰ আত্মসহায়ক গোটসমূহক এখন বজাৰ দিয়াৰ লক্ষ্যৰে এনেদৰে ব’হাগী মেলা অনুষ্ঠিত কৰা হৈছে ৷ সংবাদ মাধ্যমৰ আগত এই কথা সদৰী কৰে অসমী ব’হাগী মেলাৰ আয়োজকসকলে । এই মেলাত আত্মসহায়ক গোটসমূহে নিজে প্ৰস্তুত কৰা পিঠা-পনাকে ধৰি বিভিন্ন জনগোষ্ঠীয় সাজপাৰ প্ৰদৰ্শন আৰু বিক্ৰীৰ ব্যৱস্থা আছে ৷
উল্লেখ্য যে, তিনিদিনিয়া কাৰ্যসূচীৰে অনুষ্ঠিত হোৱা উক্ত মেলাত বিভিন্ন জনগোষ্ঠীৰ পৰম্পৰা আৰু বিভিন্ন সাংস্কৃতিক অনুষ্ঠান প্ৰদৰ্শন কৰা হ’ব ৷
লগতে পঢ়ক : হাফলঙত আৰম্ভ তিনিদিনীয়া অসমী বহাগী মেলা
