অসম-মিজোৰাম সীমান্তত অঘটন: ৰাষ্ট্ৰীয় ঘাইপথৰ পৰা টাটা ছুমু বাগৰি নিহত তিনি

হাইলাকান্দিৰ সীমান্তৱর্তী কচৰথলত সংঘটিত হ'ল এই ভয়াৱহ দুৰ্ঘটনা ৷

হাইলাকান্দি, 26 নৱেম্বৰ: সোমবাৰে হাইলাকান্দিৰ অসম- মিজোৰাম সীমান্তৱৰ্তী কচৰথলত সংঘটিত হয় এক ভয়ংকৰ পথ দুৰ্ঘটনা ৷ মিজোৰাম সংযোগী ৰাষ্ট্ৰীয় ঘাইপথৰ পৰা টাটা ছুমু বাগৰি প্ৰাণ গ'ল তিনিজনকৈ লোকৰ ৷ ঘটনা অনুসৰি মিজোৰাম অভিমুখে গৈ থকা অৱস্থাত ভাইছেড়া অঞ্চলত ৰাষ্ট্ৰীয় ঘাইপথৰ পৰা বাগৰি পৰে এ এস -24 C 4564 নম্বৰৰ টাটা ছুমুখন ৷ যাৰ ফলত থিতাহে নিহত হয় ছুমুখনৰ 3 গৰাকী আৰোহী লগতে আহত হয় আন 12 গৰাকীকৈ যাত্ৰী ৷ নিহত লোককেইজনৰ নাম হ'ল ক্ৰমে, হাবিব আলি, ছাবুল হুচেইন আৰু লাল দবি মিজো ৷ ইফালে প্ৰথম অৱস্থাত আহতসকলক কাটলিচৰা চিকিৎসালয়ত ভৰ্ত্তি কৰা হয় যদিও পাছলৈ চিকিৎসকে আহত লোকসকলক শিলচৰ মেডিকেল কলেজলৈ প্ৰেৰণ কৰে ৷

আৰু পঢ়ক: বিজেপি নেতা জয়প্ৰকাশ মজুমদাৰক প্ৰহাৰ তৃণমূল সমৰ্থকৰ