দেৰগাঁৱত অচিনাক্ত মৃতদেহ উদ্ধাৰ

দেৰগাঁৱৰ ৰাজপথৰ কাষত উদ্ধাৰ অচিনাক্ত মৃতদেহ । বৰ্তমানলৈ চিনাক্ত হোৱা নাই মৃত লোকজনৰ পৰিচয় ৷

দেৰগাঁও, 22 জুন : গোলাঘাট জিলাৰ দেৰগাঁও আৰক্ষী থানাৰ অন্তৰ্গত 37 নং ৰাষ্ট্ৰীয় ঘাইপথৰ কাষৰ ৰঙামাটিস্থিত চাহ ফেক্টৰীৰ সমীপত শুকুৰবাৰে পুৱা উদ্ধাৰ হয় এটা অৰ্ধগলিত অচিনাক্ত মৃতদেহ । স্থানীয় লোকে পথাৰত কাম কৰিবলৈ আহি মৃতদেহটো প্ৰত্যক্ষ কৰি দেৰগাঁও আৰক্ষীক অৱগত কৰে ।

ঘটনাস্থলীত আৰক্ষীৰ লোক উপস্থিত হৈ ঘটনাৰ তদন্ত আৰম্ভ কৰে ৷ অৰ্ধ উলঙ্গ অৱস্থাত পৰি থকা মৃতদেহটো দুই - তিনিদিন পূৰ্বৰ বুলি সন্দেহ কৰিছে আৰক্ষীয়ে । বৰ্তমান আৰক্ষীয়ে মৃতদেহটো মৰণোত্তৰ পৰীক্ষাৰ বাবে গোলাঘাট অসামৰিক চিকিৎসালয়লৈ প্ৰেৰণ কৰিছে ।