গোলাঘাট, 4 জুন : 2018 চনৰ অক্টোবৰ মাহতেই গোলাঘাট জিলা প্ৰাথমিক শিক্ষা বিষয়া কাৰ্যালয়ৰ উপ-পৰিদৰ্শকৰ কাৰ্যালয়ত সংঘটিত হৈছিল এক বৃত্তীয় কেলেংকাৰী । 2018 চনৰে শিক্ষক-কৰ্মচাৰীৰ House Rent & Area শিতানৰ ধন কৌশলেৰে আত্মসাৎ কৰাৰ অভিযোগ উঠিছিল কণিষ্ঠ সহায়ক তথা গাণনিক বিপুল মেচৰ বিৰুদ্ধে ।
জিলাখনৰ 270 গৰাকী শিক্ষক-কৰ্মচাৰীৰ বছৰেকীয়া House Rent & Area ৰ বাবদ আৱন্টিত মুঠ ধনৰ তিনি লাখ টকাৰ কেলেংকাৰী সংঘটিত হৈছিল কাৰ্যালয়টোত । শিক্ষক-কৰ্মচাৰীৰ প্ৰাপ্য ধনৰ পৰা গোপনে 4/5 হাজাৰ টকাকৈ কৰ্তন কৰি ভুৱা একাউণ্টৰ যোগেদি প্ৰায় তিনি লাখ টকা আত্মসাৎ কৰিছিল বিপুল মেচে ।
শিক্ষক কৰ্মচাৰী সকলে পাবলগীয়া ধন সম্পূৰ্ণ ৰূপে নোপোৱাত জিলা উপ-পৰিদৰ্শকক অভিযোগ দাখিল কৰিছিল । অভিযোগৰ ভিত্তিত উপ-পৰিদৰ্শক আতাউৰ ৰহমানে সমগ্ৰ বিষয়টো তদন্ত কৰাত বিপুল মেচৰ বিত্তীয় কেলেংকাৰীৰ তথ্য পোহৰলৈ আহে । লগে-লগে উপ-পৰিদৰ্শক আতাউৰ ৰহমানে গোলাঘাট আৰক্ষী থানাত মেচৰ বিৰুদ্ধে এক গোচৰ তৰে । এজাহাৰৰ ভিত্তিত বুধবাৰে গোলাঘাট আৰক্ষীয়ে বিপুল মেচক গ্ৰেপ্তাৰ কৰি জেৰা কৰাৰ লগতে বৃহস্পতিবাৰে আদালতত হাজিৰ কৰে ৷
