গোলাঘাট, ২৬ মাৰ্চ: গোলাঘাটত নিৰ্বাচনী কৰ্তব্যত ব্যস্ত আৰক্ষী ঢলি পৰি চিকিৎসাধীন । ভোটগ্ৰহণ কেন্দ্ৰলৈ ইভিএম নিয়াৰ সময়তে গোলাঘাটৰ পুলিবৰ হাইস্কুল খেলপথাৰত এক অবাঞ্চিত ঘটনা সংঘটিত হয় ৷ ৯৬ নং খুমটাই সমষ্টিৰ অন্তৰ্গত ভোট কেন্দ্ৰসমূহলৈ গাড়ীযোগে ভোটিং মেচিনসমূহ প্ৰেৰণ কৰা সময়তে বগীজান আৰক্ষী থানাৰ বিষয়া ৰঞ্জিত শইকীয়া হঠাতে বিদ্যালয় খেলপথাৰতে ঢলি পৰে ৷
লগে লগে তেওঁক গোলাঘাটৰ শ্বহীদ কুশল কোঁৱৰ অসামৰিক চিকিৎসালয়লৈ প্ৰেৰণ কৰা হয় ৷ সম্প্ৰতি তেওঁক উন্নত চিকিৎসাৰ বাবে যোৰহাট মেডিকেল কলেজলৈ প্ৰেৰণ কৰা হৈছে । উচ্চ ৰক্তচাপৰ ফলতেই আৰক্ষী বিষয়াগৰাকী ঢলি পৰা বুলি সন্দেহ কৰা হৈছে ।
উল্লেখ্য যে, ক’ভিড সংক্ৰমণৰ প্ৰতি লক্ষ্য ৰাখি এইবাৰ গোলাঘাট সমষ্টিত অতিৰিক্ত ২৭ টা আৰু খুমটাই সমষ্টিত অতিৰিক্ত ১০ টা অৰ্থাৎ মুঠ ৩৭ টা ভোটগ্ৰহণ কেন্দ্ৰৰ সংযোজন ঘটোৱা হৈছে । গোলাঘাট সমষ্টিত ২৮৮ টা আৰু খুমটাই সমষ্টিত ১৯৮ টা কেন্দ্ৰ থাকিব । সমষ্টি দুটাৰ তিনিটা ভোটগ্ৰহণ কেন্দ্ৰ জটিল হিচাপে চিনাক্ত কৰা হৈছে ।
কেন্দ্ৰ কেইটা হৈছে গোলাঘাট সমষ্টিৰ ৩৫ হিন্দী বিদ্যালয়, ১৯৪ ৰতনপুৰ প্ৰাথমিক বিদ্যালয় আৰু খুমটাই সমষ্টিৰ ৮৪ জৰাগুৰি প্ৰাথমিক বিদ্যালয় ভোটগ্ৰহণ কেন্দ্ৰ । ইয়াৰোপৰি, আইন-শৃংখলাজনিত দিশৰ পৰা গোলাঘাট সমষ্টিৰ ১৮ টা আৰু খুমটাই সমষ্টিৰ ৭ টা কেন্দ্ৰ জটিল তথা স্পৰ্শকাতৰ ভোটগ্ৰহণ কেন্দ্ৰ হিচাপে চিনাক্ত কৰা হৈছে । গোলাঘাট সমষ্টিত ১৯ টা আৰু খুমটাই সমষ্টিত দুটা ভোটগ্ৰহণ কেন্দ্ৰ সম্পূৰ্ণৰূপে মহিলাৰ দ্বাৰা পৰিচালিত হ'ব ।
লগতে পঢ়ক: নিৰ্বাচনী আয়োগক বুঢ়া আঙুলি দেখুৱালে কেন্দ্ৰীয় মন্ত্ৰী আৰু প্ৰাক্তন বিধায়কে
