গোলাঘাট, 29 অক্টোবৰ : নাগালেণ্ড আৰু মিজোৰাম বিশ্ববিদ্যালয়ৰ স্নাতকোত্তৰ পাঠ্যক্ৰমৰ নামভৰ্তিৰ অন্তিম তাৰিখ ধাৰ্য্য কৰা হৈছে 5 নৱেম্বৰ ৷ ইয়াকে লৈ প্ৰতিক্ৰিয়া ব্যক্ত কৰিছে অসমৰ একাংশ শিক্ষাৰ্থীয়ে ৷ ৰাজ্য দুখনত উচ্চ শিক্ষা গ্ৰহণৰ পৰা বঞ্চিত হ'ব ৰাজ্যৰ বহুসংখ্যক শিক্ষাৰ্থী ।
অসম চৰকাৰৰ শিক্ষা মন্ত্ৰী আৰু শিক্ষা বিভাগৰ ভুল নীতিৰ বাবে বঞ্চিত হ'ব এইসকল শিক্ষাৰ্থী । যিহেতু নাগালেণ্ড আৰু মিজোৰাম বিশ্ববিদ্যালয়ে স্নাতকোত্তৰ পাঠ্যক্ৰমত নামভৰ্তিৰ অন্তিম তাৰিখ ঘোষণা কৰিছে আৰু তাৰ পূৰ্বেই নামভৰ্তি প্ৰক্ৰিয়াত অংশগ্ৰহণ কৰা শিক্ষাৰ্থীসকলৰ সকলো তথ্য-পাতি বিছাৰিছে বিশ্ববিদ্যালয় দুখনে ৷
আশ্বৰ্যকৰ বিষয়টো হ'ল যে অসমৰ কলেজসমূহত এতিয়াও অব্যাহত আছে স্নাতকৰ চূড়ান্ত পৰীক্ষাসমূহ । বিশেষকৈ বিজ্ঞান শাখাৰ চূড়ান্ত পৰীক্ষাৰ ব্যৱহাৰিক পৰীক্ষাসমূহ চলিব অহা 5 নৱেম্বৰ পৰ্যন্ত । তেনে ক্ষেত্ৰত এইসকল শিক্ষাৰ্থীয়ে বহিঃৰাজ্যৰ বিশ্ববিদ্যালয়সমূহত উচ্চ শিক্ষাৰ বাবে নাম ভৰ্ত্তি কৰাৰ ক্ষেত্ৰত বঞ্চিত হোৱাটো নিশ্চিত ।
কৰ'না মহামাৰীৰ পৰিপ্ৰেক্ষিতত দীৰ্ঘদিন বন্ধ হৈ আছিল শিক্ষানুষ্ঠানসমূহ । শেহতীয়াকৈ শিক্ষানুষ্ঠান খোলাৰ সিদ্ধান্ত লৈছে যদিও এতিয়া আন এক সমস্যাৰ মাজত সোমাই পৰিছে শিক্ষাৰ্থীসকল । সেয়ে অসমৰ মুখ্যমন্ত্ৰী আৰু শিক্ষামন্ত্ৰীয়ে চুবুৰীয়া ৰাজ্যৰ চৰকাৰৰ সৈতে আলোচনাৰ মাধ্যমেৰে শিক্ষাৰ্থীসকলক উপকৃত কৰাৰ ক্ষেত্ৰত উচিত ব্যৱস্থা লবলৈ আহ্বান জনাইছে । অন্যথা ৰাজ্যৰ হাজাৰ হাজাৰ শিক্ষাৰ্থী এই বছৰ উচ্চ শিক্ষা লাভৰ পৰা বঞ্চিত হোৱাটো নিশ্চিত ।
লগতে পঢ়ক : মিঞা মিউজিয়াম সন্দৰ্ভত প্ৰতিক্ৰিয়া আমছুৰ সভাপতি ৰেজাউল কৰিম চৰকাৰৰ
