গোলাঘাট, 4 আগষ্ট : সকলোৰে চকুৰ মণি নয়নমণি শইকীয়া ৷ কমনৱেল্থ গেমছত লন বলত প্ৰথমবাৰৰ ভাৰতৰ হৈ সোণৰ পদক আজুৰি আনিলে নয়নমণিয়ে (Gold Medallist Nayanmoni Saikia) ৷ অসমীয়া সমাজত এষাৰ কথা আছে, ‘‘মন কৰিলেই ছন, বাকৰি মাটিতো ধন’’ । এই আপ্ত বাক্যশাৰী অনুসৰণ কৰিয়েই নয়নমণি আজি সুদূৰ ইংলেণ্ডত অসমৰ লগতে ভাৰতবৰ্ষৰ নাম জিলিকাই তুলিবলৈ সক্ষম হৈছে ।
এটি প্ৰায় আঠ বছৰীয়া শিশুৰ মাতৃ হৈয়ো ইংলেণ্ডৰ বাৰ্মিংহামত অনুষ্ঠিত (Commonwealth Games 2022) হৈ থকা লনবল প্ৰতিযোগিতাত সোণৰ পদক আজুৰি আনিবলৈ সক্ষম হৈছে নয়নমণি শইকীয়াই । নয়নমণি শইকীয়া সৰুৰে পৰা ভাৰোত্তলন খেলৰ প্ৰতি আগ্ৰহী আছিল । নয়নমণিয়ে সৰুপথাৰৰ চুকাফা ক্লাৱত ভাৰোত্তলনৰ প্ৰশিক্ষণ লৈছিল ।
2000 চনৰ পৰা নয়নমণিয়ে ভাৰোত্তলন খেলৰ বাবে গোলাঘাট Sports Authority of India চমুকৈ SAI ত যোগদান কৰিছিল ৷ তাৰ পাচত 2005 চনত গুৱাহাটী SAI ত যোগাদান কৰে নয়নমণিয়ে । যদিও পিছত হাতৰ আঘাতৰ বাবে ভাৰোত্তলনৰ পৰিৱৰ্তে গুৱাহাটীত লনবল খেলৰ বাবে আগ্ৰহী হৈ পৰে নয়নমণি ।
লগতে পঢ়ক : CWG 2022: স্বৰ্ণ জয়েৰে ইতিহাস ৰচিলে অসমৰ নয়নমণিয়ে
পৰৱৰ্তী পৰ্যায়ত লনবলৰ প্ৰতি একান্ত আগ্ৰহ আৰু একাগ্ৰহতাৰ বাবে ৰাজ্যিক, ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত জিলিকি উঠিবলৈ সক্ষম হৈছিল নয়নমণি শইকীয়া । ক্ৰীড়াক্ষেত্ৰত দেখুওৱা ধাৰাবাহিক পাৰদৰ্শিতাৰ বাবে 2011 চনত নয়নমণিয়ে দ্বিতীয় বন সুৰক্ষা বাহিনীৰ কনিষ্টবল পদতো নিযুক্তি লাভ কৰে ।
2013 চনত সৰুপথাৰৰ টেঙাহোলাৰ ভাস্কৰ গোহাঁইৰ সৈতে বিবাহ পাশত আবদ্ধ হয় নয়নমণিয়ে । বিবাহৰ পিছতো পিছলৈ ঘূৰি চোৱা নাছিল নয়নমণিয়ে । লনবলত এটাৰ পিছত এটা মেডেল আজুৰি আনিবলৈ সক্ষম হৈছিল এইগৰাকী প্ৰতিভাবান খেলুৱৈয়ে । নয়নমণি আৰু ভাস্কৰৰ এটি সাত বছৰীয়া কন্যা সন্তান আছে । নিজ কন্যা সদায়েই মাতৃৰ খেলক লৈ উৎফুল্লিত ।
নয়নমণিৰ এই যাত্ৰাত নিজ পিতৃ মাতৃৰ উপৰিও শাহুৱেক, স্বামীৰ উদ্যোগ লেখত ল’বলগীয়া । উল্লেখযোগ্য যে, নয়নমণিৰ শাহুৱেকো এথেলেটিকচত এগৰাকী ৰাষ্ট্ৰীয় পৰ্যায়ৰ খেলুৱৈ আছিল । সমাজৰ অদূৰদৰ্শিতা আৰু এচাম লোকৰ বাবেই তেওঁ বিশেষভাৱে আগবাঢ়িব নোৱাৰিলে ।
সেই সময়ত শাহুৱেকে অনুশীলনৰ সময়ত হাফপেন্ট, লংপেন্ট পিন্ধাৰ বাবে একাংশ লোকে গালৈ শিল দলিয়াই বাধা প্ৰদান কৰিছিল । শাহুৱেকে নয়নমণিক প্ৰশংসা কৰি কয় খেলৰ সময়ত নয়নমণিয়ে যদিও হাফপেন্ট, লংপেন্ট পিন্ধিবলৈ বাধ্য হয় কিন্তু ঘৰত থকাৰ সময়চোৱাত চাদৰ-মেখেলা পিন্ধি নিজৰ সংস্কৃতিকো ৰক্ষা কৰি আহিছে । বৰ্তমান নয়নমণিয়ে অসমত নাৰী সকলৰ বাবে এক আদৰ্শ স্বৰূপ হৈ পৰিছে (Assam girl Nayanmoni Saikia won gold in CWG 22) ।
লগতে পঢ়ক : Nayanmoni Saikia will be rewarded as DSP: উপ-আৰক্ষী অধীক্ষক হ’ব নয়নমণি শইকীয়া
