গোলাঘাট, 4 ছেপ্তেম্বৰঃ গোলাঘাটত দিনে নিশাই জাকে জাকে বন্য হস্তীয়ে জনাঞ্চলত প্ৰৱেশ কৰি সৃষ্টি কৰিছে আতংকময় পৰিৱেশৰ । প্ৰতিদিনে ভয়াৱহ ভাৱে অব্যাহত আছে হাতী মানুহৰ সংঘাত । দিনৰ পোহৰটো ঘৰৰ পৰা ওলাবলৈ,পথেৰে অহা যোৱা কৰিবলৈ এতিয়া ভয় কৰা হৈছে গোলাঘাটৰ একাংশ ৰাইজে । গোলাঘাটৰ মুৰফুলনী অঞ্চলত দিনৰ পোহৰতে হাতীয়ে প্ৰৱেশ কৰি চলাইছে সন্ত্ৰাস ।
পোৱালী সহ ৭০-৮০ টা বনৰীয়া হাতীৰ জাকে আজি বহুদিন ধৰি বিচৰণ কৰি আছে অঞ্চলটোত । দিনৰ ভাগত চাহ বাগিচাত আশ্ৰয় লৈ থকা হাতীৰ জাকটোৱে সন্ধিয়া হোৱাৰ লগে লগে মুৰফুলনী,কোৱানী,পুৰনিমাটি,ফুলবাৰী,বকিয়াল, ৰংবং আদি অঞ্চলত প্ৰৱেশ কৰি নিশাৰ উপদ্ৰৱ চলাই । ঘৰ দুৱাৰ ভাঙি,খেতি পথাৰ অনিষ্ট কৰি ত্ৰাসৰ সৃষ্টি কৰি আহিছে । স্থানীয় ৰাইজে বন বিভাগক শীঘ্ৰেই হাতীৰ জাকটোক বনাঞ্চললৈ ঘূৰাই পঠাবলৈ অনুৰোধ জনাইছে ৷ অন্যথা ভয়াৱহ পৰিস্থিতিৰ সৃষ্টি হোৱাৰ শংকা ব্যক্ত কৰিছে ৷
