নুমলীগড়ত বন্য হস্তী খেদাত ব্যস্ত গাঁওবাসী

দিনে নিশাই হাতী খেদাত ব্যস্ত সকলোৱে। । নিৰ্বিকাৰ বন বিভাগ । যিকোনো মুহূৰ্ততে অঘটন সংঘটিত হোৱা আশংকাই দেখা দিছে অঞ্চলটোত ৷

গোলাঘাট, 7 মাৰ্চঃ গোলাঘাটৰ নুমলীগড় চাহ বাগিচাৰ কাষৰ পাইপ লাইন এলেকাত নিশা পুৰুষ-মহিলা সকলো ওলাই আহিবলগীয়া হৈছে হাতী খেদিবলৈ ৷ কিয়নো কাৰ্বি পাহাৰৰ পৰা নামি অহা পোৱালি সহ 50-60 টা বন্য হস্তীৰ জাকে দিনে-নিশাই বহু ঘৰ বাৰী খেতি পথাৰ তহিলং কৰি আহিছে।

কেবাদিনো ধৰি পোৱালিসহ বন্যহস্তীৰ জাকটোৱে অৱস্থান কৰি আছে নুমলীগড়ৰ সমীপৰ গাঁওসমূহত। হাতীৰ জাকটোক খেদি পঠাবলৈ চেষ্টা অব্যাহত ৰাখিছে স্থানীয় লোকসকলে । কিন্তু বাৰে বাৰে বিফল হৈছে কাৰণ হাতীৰ জকটোক যিমানেই খেদিছে হাতীৰ জাকটোৱেও উভতি ধৰি খেদিছে মানুহক। যিকোনো মুহূৰ্ততে অঘটন সংঘটিত হোৱা আশংকাই দেখা দিছে অঞ্চলটোত ৷

ইফালে হাতীৰ জাকটোৰ ভয়ত বাগিচা সমূহত কাম কৰিবলৈ ভয় কৰা হৈছে শ্ৰমিক সকলে। হাতীৰ জাকটোক আঁতৰাই পঠাবলৈ বন বিভাগে লোৱা নাই কোনো ব্যৱস্থা । এনেদৰে এতিয়া অব্যাহত আছে জীৱন মৰণৰ যুঁজ । এফালে খাদ্য আৰু বাসস্থানৰ অভাৱত পৰা হাতীৰ জাক আনফালে নিজৰ ঘৰ,খেতি পথাৰ খন বচাবলৈ চেষ্টা কৰি থকা অসহায় জনতা । এইয়া যেন এতিয়া নিত্য-নৈমিত্তিক ঘটনাত পৰিণত হৈছে নুমলীগড়ত ৷

লগতে পঢ়কঃ বাজেটত ঘোষিত আচনিৰ ধন ক'ৰ পৰা আহিবঃ ডঃ দেৱজিৎ মহন্ত